Pakistan- ah thlawhtheihna tla

Nimin zing khan Pakistan-a Margalla Hills-ah thlawhtheihna, airbus A321, flight ED202 a tla a, a chhunga chuang mi 152-te chu an thi vek a ni. Thi zingah hian America mi 2 an tel.

Thlawhtheihna tla hi private airline, Air Blue thlawhtheihna niin, Karachi atanga Islamabad pana thlawk tur a ni a, Daman-e-Koh viewpoint bula Margalla tlang a su niin police-ten an sawi. Pakistan Civil Aviation Authority thupuangtu, Pervez George chuan thlawhtheihna tla-ah chuan khualzin 146 leh thawktu paruk an chuang niin a sawi.

Tunhnaiah Islamabad-ah hian ruah a sur nasain, khawpui chu chhum chhah takin a bawh reng bawk a ni.Nimin pawh hian chhum a zing nasa hle a, mita hmutu thenkhat chuan thlawhtheihna pawh hi a thlawk hniam hle niin an sawi. Civil aviation official-te chuan aircraft chu radar screen-a hmuh theih loha a awm hnu reiloteah a tla niin an sawi. Thlawhtheihna tlakna hmun hi ramngaw chhah tak, inkalpawhna mumal pawh a awmlohna hmun a ni.

Thlawhtheihna tlakna hmunah hian chhanchhuah hna thawktu, paramilitary Pakistan Rangers leh official-te an thleng tawh a, khua a a that loh avangin hna a thawh chak theih loh a ni.

Police-te chuan thlawhtheihna chu a chhe nasa hle niin an sawi a, a tlak hnu hian meikhu nasa tak hmuh zui a ni. Pakistan thuneitute chuan thlawhtheihna tlak chhan chu hriat la ni lo  mah se, firfiakte an inhnamhnawih an rin loh thu an sawi.

Tags: Airbus tla, Pakistan