Venezuela ramri- ah Sipai dahbelh

Colombia sorkarin a thenawm ram, Venezuela ram chhungah  Colombia helpawl hruaitu eng emaw zat an awm nia a puh mek laiin Venezuela sorkar chuan ramri ven hna thawk turin sipai tam zawk a dah belh.

Hetihlai hian UN-a Venezuela ambassador, Jorge Valero chuan ram pahnihte inkara inhriatthiam lohna awm mek chu boruak muanawm tak hnuaiah an chinfel theih a beisei thu a sawi.

Venezuela sorkar chuan Colombia nena an inri-na,  km 2,000 chuanga thuia duty turin sipai 1,000 vel a tir tawh a ni. Heng sipaite hian Colombia-in a bei a nih chuan chhanglet nghal turin an intiam vek bawk.

Venezuela President, Hugo Chavez chuan kar kalta khan Colombia nena an inzawmna tichatin, an ram atangin Colombia palai a hnawtchhuak a ni. Hemi hma  hian Colombia chuan kum 1980 chhoa Sweden siam ralthuam, Venezuela sorkarin a lei chu Colombia  helpawl, Revolutionary Armed Forces of Colombia (FARC) kutah a lut niin a sawi bawk. Hei vang hian ram pahnihte hi an inhmuthiam lo hle a, Chavez-an Colombia leh US sipai thawkdunte chu an ram himna a ti derthawng hle nia a sawi chuan an inkar boruak hi a tichhe zual bawk a ni.

Hetihlai hian Venezuela leh Cuba chuan Thawhtanni khan thawhdunna tur inremna thluthlung 139 an ziak. He inremna hi Cuba hruaitu, Raul Castro leh Venezuela Vice President Rafael Ramirez-ten Cuba khawpui, Havana-ah an ziak a ni. Inremna an ziah tak hi food, energy, mining, healthcare leh light industry lama thawhdunna tur a ni a, ram pahnihte insumdawn tawnna hi kum 2009 khan US dollar maktaduai 3.138 a tling a ni.

Tags: Venezuela