Inhmangaihna kawnga nupa tih tur
Mihring nuna thil hlu tak chu hmangaihtu leh hmangaih neih hi a ni. Miin hmangaih a neih chuan a hun tam zawk leh ngaihtuahna te chu a hmangaih hnenah a dah thin tur a ni a. Hmangaihtu a nei a nih chuan, amah hmangaihtu chuan ngaihsak in duat thiam hle turin a phut thin bawk ang. Hei hi hringnun tinuam tu leh nunkawng hlimawm a min hruaitu a ni. Inngaizawngte chauh hian an inhmangaihna leh an induhna an tilang tur a ni lova, nupa a insiam tawhte hlei hlei hian an inhmangaihna chu an tilang tawn thiam hle tur a ni. Nupa nih tawh chuan engkim intawm leh pumkhat an lo ni tawh a, an inhmangaihna pawh an inhriatthiam pui tawn tur a ni. Inngaizawngte anga inthen leh mai mai thei an nih tawh lohna lai kha an hriat reng a pawimawh a, fanau neih tawh chinah phei chuan an inhmangaih zual sauh tur a ni. Fanaute hian nupa nun an phuar nghet em avangin an fate mithmuhah pawh nupa inlungrual leh inhmangaih an nihna kha an lanchhuahtir thin tur a ni. Inhmangaih tawn thiam leh inlungrual thiam tak nupa chu fate ah a rahtha a chhuak thin. Engtingnge, kan nupa hi kan inhmangaih tawn theih ang? tih zawhna i zawt a nih chuan, a hnuai a mi hi han chhiar teh le:
In inngaina tur a ni:
Nupa inngaina thei miah lo hi a awm theih a nia. Nupa nih tawh chuan inngainatna a piang tel tur a ni. Hmeichhe thenkhat mahni pasalte dik lohna lai kher kher peih mi an awm a, heng mite hian an pasalte an ngaina thei lova, an bula awm tam aiin midang bula hun hman an thlahlel zawk thin. Chutiang bawkin mipa thenkhat chuan an nupuite ancheh zia emaw an fel lohna lai an hmu thei a, an hau reng thin. Hetiang hi a tu ve ve tan pawh sim a tha. A sim theih dan kawng tawngkam tha taka inkawhhmuh a, inhrilh tawn hian inngainatna a piang duh a ni.
Hlim takin thu chhia tha inhrilh tawn tur:
Nupa hlim ni tur chuan thu engkim sawi duna, ngaihdan inzawh tawn hian hlimna a thlen thin a ni. Pa berin a thu a sawh sawn duh miah lova, nu ber thu a ngaihchan ngai loh chuan inngainat a har thin. Chutiang bawkin nu ber chuan pa ber thusawi ngai pawimawh miah lova, ro a rel zat zat reng chuan inngainatna a awm ngai lo a ni. Chhungkaw ro chu an nupa inlungrualna a rel dun thin tur a ni.
Infak tawn tur:
Insawisel reng hian inngainatna a thlen thei lova, thinurna chauh a thlen zawk thin. Chuvangin, i kawppui chu fak hreh lovang che. A thil tha tihna kawngah fak thin la, fel i tihzia te, a tel lo chuan engmah i nih loh ziate kha hrilh hre thin ang che. Hetianga i tih fo thin chuan a ngaina tial tial che ang a, a thlah thei hauh lovang che. Nang pawh a sawisel lovang che ang a, a fak fo thin zawk ang che. Min sawisel a, min fak ngai lo tu chu mi tumah in kan ngaina thei lo a nih hi.
Tawngkam vin hman loh tur:
Mi zaidam bula awm chu a thlamuan thlak a, rilru pawh a hahdam duh a ni. Mi vin tak leh ang buan buan bula awm chu a hahthlak mai bakah rilru a thawippik a, a hrehawm hluah hluah thin. I kawppui kha i biak reng reng in tawngka vin taka be lovin, zaidam tak leh nelawm takin i be thin dawn nia. Hei hian i huat loh zia leh i ngainat zia a lantir a, thinrim vin taka i biak reng thin chuan a ngaina thei hauh lovang che. I hmangaihna chu i tawngkam in i tilang reng thin tur a ni.
I ngaih zia hrilh thin rawh:
Amah aia hmangaih i neih loh thu hrilh fo thin ang che. Zing thawh hlim atangin nitin i ngaihsakzia tilang la, a thusawi ngai pawimawh thiam hle bawk ang che. Thinrimna cho chhuak tu nih aiin a khap daitu zawkah tan zel tum ang che.
(Published on December 2009)
