Vun ro tana enkawlna tha
Skin & Beauty
Thlasik rim a rawn nam tan a, vun a ro in a chat leh tan a. I taksa leh hmai vunte kha ro lo leh nalh taka a lan reng theihna tur atan chuan i inenkawl uluk hle a ngai dawn a. Heng a hnuaia mite ang hi i vun ro dan a nih chuan lo chhiar uluk hle ang che:
# I hmai vunah khan khir leh ro taka khawk deuh tim tiam emaw val thliah thliah a awm chuan moisturising cream nitin hnawih ziah ang che.
# I vun kha han khawih zawnga a thap hrup a nih chuan, i vun kaw chhunga thlan lo chhuahna kha a hmuh theih tihna a ni ang.
# I mit bul velah khan thil inrin emaw val kual a awm a nih chuan, a reh mai mai thei tawh lovang a, mahse, a rawn zual lehzel tur erawh chu a dan theih a ni.
# I nghawng leh biang vunte chu a chuar deuh ang.
A chunga kan sawite khi thlasik laia vun awmdan tlangpui a ni a. A enkawl dan pawh thil harsa tak a ni lem lo. Mihring vun hi kan boruak hip luh azir hian a danglam nasa thei hle a. Engpawh chu nise, kan vunte hi fai takin kan dah reng tur a ni.
Kan vun hian mawm leh hnawng tam tak a pai ve reng a, mahse, boruak hip dan te, kum upat zel vang leh taksa hrisel lohna avangin kan taksa mamawh ang tawk pai lo mi tam tak an awm a ni. Taksa in a mamawh ang tawk mawm leh hnawng a neih loh chuan vun leh taksa dangte kha a ro thin a ni. Thau lam pang inhnawih leh ei teuh ang chuan tui in tam hi vun ro tan chuan a tha ber a ni.
I vun kha a ro loh nan hengte hi i tih a ngai dawn a ni: Chaw tha leh hrisel tha chauh ei tur, zanah darkar riat aia tlem mut loh tur a ni a. Thlai rah hrisel leh thei hrisel ei tam hi a tha hle bawk a. Zing boruak thiang tak hnuaia exercise lak leh nitina hmai vun enkawl uluk hi hmai ro tana tha tak a ni.
Hmeichhe tam tak chuan an hmaiah make-up tam tak an hnawih thin a. Chuvangin, hmai tihfaina hmanraw chi hrang hrang hmanga tihfai peih hi a tha hle a ni. Hmai tihfai nana tha tak chu cactus cleanser hi a ni a, limbu tui hmanga tihfai pawh a tha hle a ni.
Cactus hian mawm a pai hnem a, cactus tui hmangin hmai massage pahin hmai chung leh hnuai lam te kha nuai thin tur a ni. Hmai ro tan chuan a tha hle a ni. A bikin hnar, khabe hnuai, nghawng leh beng kawm te nuai nasat tur a ni. I hmai i tihfai dawn reng rengin lapaw thianghlim tak hmang thin ang che. Zingah leh mut dawna hmai tihfai hi theihnghilh miah loh tur a ni. Limbu tui hi hmai tihfai hlenna a ni lova, mahse, hmai a tilang fiah a, bawlhhlawh awmte a tifai hneh em em a ni. Cactus hian hmai zur tur leh hmaia inrin emaw val awm tur a vengin a tifai thei a ni.
Hmai toning thin hi hmai ro tan a tha hle a ni. Hmai tihfai nana tha tak leh theihnghilh miah loh tur chu hmai toning hi a ni. Cleansing hmanga hmai i tihfai zawhah a tawp nan toning hmangin i tifai leh dawn nia. Toning avang hian hmaia bal awmte kha a bo vek thei a ni. Toning lotion tha tak tak lei tur a awm tawh a. chung hmang chuan hmai a tifai theih a ni.
(Published on December 2009)
