Nupa inngeih lohna chhan te
Mipa leh hmeichhiate hi kan pianhmang a inang lo ang bawkin kan ngaihtuahna leh rilru pawh a danglam a. Kawng tam takah kan inang lo a ni. Nupa nih tawh hnuah phei chuan insawiselna hi a tam nasa lehzual a. Mipa leh hmeichhia nupaa insiam tawh te rilru leh ngaihtuahna tam zawk chu a hnuaia mi ang hi a ni. Nupa inkara lungawi lohna chhan hrang hrang an sawichhuah ngam loh thinte chu heng te hi a ni:
An nupuite laka mipate lungawi lohna chhan hrang hrangte chu:
@ Ka thil tih apiangah hian tih hmaih ka neih thu leh ka chet fel loh thu a hnen atang hian ka dawng ziah.
@ Ka thil tih leh awmdanah hian sawisel tur thar a nei reng thin.
@ Engkim mai hi tunah ti nghal vek turin min duh a. Dawhtheihna a tlachham a ni.
@ Ka thilsual tih leh tih palh thil te chu theihnghilh nghal mai lovin, a hrereng thin.
@ Tanpui ka ngaihna zawnah a tanpuina ka dil in, ka dik lohna lai rawn sawichhuah daih a ching a, a va han hahthlak tak em.
@ A ngaihtuahna leh rilru te chu hriatpui a, a dinhmun hrethiam tak mi ka nih a beisei reng thin.
@ Ka thiante leh midangte hnena hun ka hman tam deuh changte hian, a tan hun ka hman ve ngai loh avanga a lungawi loh thu min hrilh fo thin. Midangte ka ngai pawimawh zawk niin a hre thin.
@ Inchhungkhurah theihtawpa ka tanpui ve pawhin, ka theihna tlemzia hlir min hrilh a. Engmah pawh ti tha peih lovah min chhuah leh thin.
@ A bulah chuan vangtirhkoh ang maia fel famkima awm turin min duh a, a duh anga ka awm theih lovin a vui nasa thei hle.
@ Engkim ah hian lungawina a hmu lova, engmahin a tihlim tak tak thei lo.
@ Ka hnathawh hah lampang ngaihtuah lovin, pawisa kan neih loh thu a hre thei em em a. A lakah hian chak zawk nihna ka chang thei lo a ni.
@ Sum ka kawl in, ka hmanna min zawt sek a, engtia chhan tur nge ka hre ngai lo.
@ Ti tura min duh leh tukte chu a sang thei hle a. Ka tih theih lovin lungawi lohna a zawng a. Mipa tlaktlai lo leh nep takah min chhuah leh thin. A mit ka tlung zo ngang lo a ni.
@ A kiangah hun hman ka tuma, a hnena ka kal apaingin tih tur a ngah zia leh ho mai mai a hun hman a theih loh thu min hrilh leh thin si a.
@ Sawiselna lai tur neia ka inhriat loh pawhin a ni chuan a hre thei em em a, a kiangah chuan thil tisual thei lo leh ngilnei taka awm thiam a ngai thin a. Chutiang chuan ka awm emaw ka tih pawhin a haider tlat thin.
@ Inhauh nikhua changin inthen hial duh khawpin a thinrim a. Naupang enkawlna ah ka tlin loh zia a sawichhuak reng bawk thin.
An pasalte laka hmeichhiate lungawi lohna chhan hrang hrangte chu:
@ An thawmhnaw leh engkim mai hi inchhung hmun hrang hrangah an chhep hnawk a. A sulhnu tifai reng rengin hun ka hmang thin.
@ Hnathawk a kan chhuah ve ve changte hian, In kan thlen leh hian kei chuan ka thawh chhunzawm char char laiin a ni chuan engmah inchhungah tih ve a tum ngai lo.
@ Hna ka thawh laiin TV hmaah a thu a, a duh duh a en a. A chhiahhlawh ka ni bik lo.
@ Kan inneih hma kha a ang tawh lo. Engkim mai hi a theihnghilh zo vek a.
@ Inchhungkhur chu ka enkawl vek a, min tanpui leh enkawl pui pawh a tum ve lo.
@ Ka buai zual changa min lo pui tura ka tih hunah chauh min pui thin. Engvangin hetianga min en theih le?
@ Titi dunna nei tura ka tawng pui hlekin thil dang a sawi kai a, tuk tha pawh kan nei thei lo.
@ Ka hnena thu a sawi duh chuan ka tuipui nge thupui lo pawh ngaihtuah lovin a duhzawng chu a sawi char char a.
@ Min ngaihsak lova. Ka hnen atangin a duhzawng a hmuh loh chuan engah mah min ngai lo.
@ Kan pahnih hian hmangaihna hlimawm tak kan zawh thei tawh lo. A hna thawh, TV en leh mut a ngai pawimawh zawk.
@ Nilengin inchhunga kan fate enkawlin hun ka hmang a, a hnathawh rawn haw veleh ka fel lohna min hrilh leh chiam thin.
@ Chhungkaw sum hmandan chungchang kan sawidun apiangin insual duh khawpin kan inhau buai thin. Ka ngaihdan ka sawi ve te chu a ngaithla duh ngai lo.
@ Ka pahnihin hun fal kan nei ngai lo hle a. Nupa nun kan hman dawn chauhin min hnaih thin.
@ Ka landan leh hmelhmang chu min fak ngai lova, nitin hian min en liam tawp zel thin. A lak atang hian fakna awka ka hre ngai lo.
@ A nunah hian pawimawhna ka nei ve lo emaw ka ti hial thin. A bulah hian engtianga hun hman tur nge pawh ka hrethiam lo.
@ Naupang enkawlna ah min papek zo vek a. A duh hun hunah a lengchhuak a. Naupang in dik lohna an neihin min hau leh hrep thin si a. Lengchhuak lova inchhungkhur ngaituah turin min duh hle a ni.
(Published on December 2009)
