India-in vansanga indo thlawhna tui thunna tur lei a tum thar leh ta
Vansang lama ram venhim hna thawktu leh indo thulha hman tura India ramin indo thlawhna a neihte chuan hla zawk an thlawh theih nan van boruak a an thlawh lai renga a tui thun belh theihna tur a ngaihtuah hlawhchham hnu-in ruahmanna thar nena hma la lehin chutiang ti thei tur thlawhna changkang siamtu tur nen inremna thuthlung ziak fel turin a inkau leh ta reng mai.
India chuan European aerospace major EADS hnen atanga US 1.5 billion dollar zet a lei tura indo thlawhna tui thuntu tur thlawhna lian leh changkang tak 6 lei nana thluthlung an ziah fel vek tawh a tlawlh leh tak hnu khan tunah hian ruahmanna thar siam lehin US “Boeing” leh Russian “Ilyushin” nen an indawr leh mek tiin Nilaini khan Defence Ministry official te chuan an puang.
Hetianga India ram indo thlawhna ten vansang a an thlawh laia a tui thunbelh saktu tur thlawhna an lei tur chungchangah hian Defence minister A K Antony chuan thuruk zep then nei ni awm takin, “Theihtawp chhuah a lei ngei tum mek a ni,” a ti.
Iandian Air Force (IAF) hian EADS siam Airbus A-330 MRTT (multi-role tanker transport) paruk lei tumin hma a la kha a ni a. Mahse, a man a to uchuak lutuk a ngaia nikum kum tawp lama Parliament session neih hnuhnun bera inhnialna a chhuah tak avang khan Defence minister A K Antony rawtna angin contract tihtawp leh hnuhnawh kha a ni a. Tunhmaa Uzbekistan atanga Ilyushin-78 paruk zet a lo lei tawhte ai khan tuna lei tuma an veh mek A-330 te hi an tha zawk niin tarlan a ni.
Tuna India ram indo thlawhna te hian tonne 75 zet phur thei IL-78 an hmang mek a ni a. Hetiang chi thlawhna changkang leh lian tak avang hian India ram indo thlawhna chhuanvawr Mireage-2000, Jaguar leh Sukhoi-30MKI te hi a let tam taka thui thlawhtir theiin India ram indo thlawhna te chu a letin a thuam tha zawk a. Indo thlawhna Sukhoi kan hman mek hian kilometre 3,200 zet a thui ralthuam hlauhawm ber chi tonne 8 zet a rit phur chungin a thleng thei a. Hetiang chi thlawhna thlawh laia a tui thuntu India ramin a neih chuan Sukhoi chuan a let a thui thlawk theiin China ram pilril berah pawh bomb chak ber ber chi pawh a thlak dum dum thei tawh dawn a ni.
Hetianga India ramin van thengreng a indo thlawhna tui thunna tur lei tuma hma a lak mek lai hian India ram hmelma hnai ber Pakistan chuan Ukraine atangin nikum kum tawp ruai khan thlawhna tui thuntu 4 zet a lo lei tawh a nih kha.
