Taiwan ram hnena ralthuam a hralh thin vangin China-in US a vau nawn
China chuan United States-in Taiwan rama ralthuam hralh a bansan vat loh chuan China leh US inlaichinna hian a tawrh phah ngei ang tiin a vaukhan leh ta.
Tihdanphung a an lo neih tawh thin News Briefing nein Foreign Ministry thupuangtu nu Jiang Yu chuan, “US-in Taiwan ram hnena ralthuam a hralh hi engtikawng zawng mahin kan ngaithiam thei ngai lovang a, kan palzam mai mai thei hek lovang,” a ti a. “Hetianga US chet dan hi kan dodal tlat dawn a, kan thiltihah kan chiang hle bawk,” tiin a sawi.
Hetianga China thinrimna a sosan leh tak thut chhan hi kar hmasa Nilaini mai khan US chuan Taiwan ram tan Patriot missile changkang tak mai a hralh tia US Defense Department-in thuchhuah a siam vang kha a ni a. China thenawm ram hnena hetiang ralthuam hlauhawm tak mai US-in a hralh leh ta mai hi ngaithiam lovin China chuan Thawhlehni khan a duh lohzia a lo puang tawh nghe nghe a nih kha.
Taiwan ram mipuite tana tha zawk tura ngaia thuk taka China inrawlhna chhan hi hre chiang thawkhat a inngaiin China chuan Taiwan ram hnena hetiang ralthuam hlauhawm a hralh chhunzawm zel a nih chuan China leh US inlaichinna hian a tawrh phah ngei ang a ti.
China thenawm ramte hnena ralthuam hlauhawm hralh lo tur hian China leh US hian August 17, 1982 khan inremna thuthlung pawimawh tak mai Joint Communique an lo siam diam tawh kha a ni a. “Kha inremna ang khan US hian China thenawm ram hlauhawmte hnenah ralthuam a hralh tur a ni lo,” tiin China Foreign Ministry thupuangtu nu Jiang Yu chuan a sawi.
“Hetianga US lamin ralthuam hlauhawm an hralh reng chuan hun rei tak chhunga China leh US inlaichhinnate tha tak ni thin khan a tawrh phah ngei ngei a rinawm,” tiin military expert Yang Yi pawhin a sawi nghe nghe.
