A vawi hnih nan Pakistan hel LeT-ten India rama hotel pakhat an luhkhung leh ta
A vawi hnihna atan India rama khualzin mite thlen thinna hotel chu Pakistan hel pawlin an luhkhung leh tak avangin January 7, (Ningani) khan sipaiten beihpui an thlak leh a. Darkar 22 vel zet an inkah hnu-in Srinagar a hotel pakhatah Pakistan hel pawl chi khat Lashker-e-Toiba ni ngei a hriat rawlral a che thin sipai 2 kahhlum an ni tiin police thuchhuak chuan a tarlang.
LeT ni ngei a rin rawlral a che thin ramhnuaimi eng emaw zatte chuan Kashmir khawpui Srinagar a hotel pakhatah bu an khuar tlat avangin India sipaite chuan silai mai a luh chhuah theih a ni lo tih hriain Ningani khan granade leh rocket launcher nen an bei a. Nimin piah Nilaini atanga inralsai tawh kha ni mah se, hotel atanga hel pawlin an rawn beih ve reng avangin India sipaite chuan an luhchhuah mai thei lo reng a. Hotel a bu khuar tura an rawn chet phat atang khan sipai pakhat kap hlumin mi dang pawhin nunna an chan phah tawh kha a ni a. Hetia burip taka an inbuatsaih lawk avang hian sipaite tan pawh awlsam taka luhchhuah mai theih a ni lo tih an hriat chian hnu-in Ningani atang khan ralthuam hlauhawm zawk nen beihpui an thlak ta a ni.
Srinagar hotel a tangkhangte chhanchhuahna beihpui thlak avang hian mi 9 zetin hliam an tuar tawh a. Tichuan, hliam tuar zat chu police pakhat leh paramilitary sipai pakhat niin civilian 8 an an ni ta a. Ningani khan civilian hliam tuar pakhatin a thih phah leh tak avangin thi zat chu 3 an ni ta a ni.
Mit a hmutute sawi danin, sipai leh hel inbeih lai hian Srinagar a Punjab Hotel chu a kang nasa tawh hle.
He hotel hi Pakistan bel tlat thin Lashkar-e-Toiba hel ni ngei a rin mi 2 ten thihchilh huam a an luhkhung avangin beih an awlsam lo hle a. Hotel chhehvel a mi cheng 600 te chu hmun him lama an thiar chhuah zawh vek hnuah sipaite hian beihpui an thlak a. Kangmei leh silaimu leng reng chungin he hotel luhkhungtu hel 2-te hi a hmunah ka pawh chhawn lova kah hlum an ni ta a ni.
