Thil man sang vangin nithum rorel thei tawh lo

Thil man sang (price rise) chungchang chuan nimina parliament inkhawm a nghawrleh a, ni thum a nghawrna leh ro rel thei loa an awmna a ni ta. Lok Sabha leh Rajya Sabha inkhawm chu chhun dar 12:00 thleng chawlhtir phawt a ni a, a hnuah nileng atan chawlhtir an ni ta a ni. BJP hruai eptu pawlte chuan thil man sang chungchang hi a tawpa vote lakna tura sawihona neih an kar a, nilaini-ah khan Lok Sabhaah chuan Speaker Meira Kumar chuan thil man sang chungchanga adjournment notice a lo hnawl tawh nain nimin zingah khan thil man sang sawihona turin notice thar eng emawzat thehluhleh a ni.

Lok Sabhaah chuan eptu hruaitu Sushma Swaraj chuan eptu hruaitu dangte nen thil man sang chungchang hi an sawichhuak a, Speaker Meira Kumar chuan thil man sang chungchang chu zawhna hun hnuah sawihona neih a tiam chu an pawm lo a ni. Speaker chhannaah hian lungawi lovin eptu memberte chu house lailiah an chhuak a, ro a rel theih loh a, inkhawm chu chawlhtir a ni. Chhun dar 12:00-a inkhawmleh a nihleh pawhin house chhung dinhmun a danglam chuang lo a ni.

Rajya Sabha inkhawm pawh nileng atana chawlhtir hmain vawikhat chawlhtir a ni a, BJP hruai NDA memberte chuan Environment & Forest Minister Jairam Ramesh-an member thar atana rinawmna thutiam a chham zawkin an lo ding a, bengchheng lo tura Chair-in a ngenna chu an pawisa lo a, eptute chuan an thil ngiat an auchhuahpui a ni.

Tags: Parliament of India, Thil man sang