Eptu Party lungawi loh vangin inkhawm titawp

Nimina Parliament in hnih inkhawmah eptu party-ten ramchhunga nitin mamawh thil man sang zel avanga an lungawilohna aupui a, inkhawm an aubuai avangin Rajya Sabha leh Lok Sabha-ah rorel inkhawm tihtawp a ngaih phah a ni.

Rajya Sabha-ah chuan Question Hour neih veleh eptu pawlten an lungawiloh thu an aupui nghal a, inkhawm hruaitu PJ Kurien chuan member-te chu khap tumin minister-te chu an paper-te pharh turin a hriattir a ni. Mahse rorel chhunzawm thei loa eptu pawlte hi an aubuai  zel avangin inkhawm a titawp ta a ni. Hemi hma hian Chairman Hamid Ansari chuan inkhawm hi a lo titawp lailawk tawh bawk.

Lok Sabha-ah pawh eptute aubuai avangin chaw chhun ei hmain inkhawm hi tum hnih tihtawp lailawk a ni. Eptu pawl, SP leh RJD member-te chu an hruaitu Mulayam Singh Yadav leh Lalu Prasad kaihhruaiin UPA sorkar chu ramchhunga thil man sang khuahkhirh zo loah puhin, bang tura phutin House chhungah a au a, BJP leh eptu party dangte pawhin thil man sang zel vanga an lungawilohna lantirin chhuat an lo per bengchheng bawk a ni.

Eptu hruaitu, Sushma Swaraj-i chuan khawnvartui leh LPG man tihsan chuan mipui nawlpuite a nghawng buai hle tih sawiin, hemi chungchang sawiho hi an phut tih a sawi. Speaker-in eptu member-te a khap daih theih loh avangin inkhawm hi tihtawp a ni ta a ni.

Tags: Lok Sabha, Rajya Sabha