Queen’s Baton Kohima thleng

XIX Commonwealth Games 2010 chhinchhiahna, Queen’s Baton chu Pathianni khan Nagaland khawpui, Kohima-ah tlanpui a ni.

Queen’s Baton hi Parliamentary Secretary, Naiba Konyak-an Police HQ junction atanga vailiamin,  Classic Island, PWD junction, SKV junction, WW II Cemetery, TCP Gate, MLA Hostel junction, Old NST, Razhu Point-ahte tlanpui a ni. Hemi hma hian Baton hi biker 50, tribal hnam hrang hrang mahni hnam incheina nena inthuam leh sport person 72-ten Power Minister, Doshehe hoin IG Stadium atangin an tlanpui a, PHQ junction-ah Naiba Konyak hnenah hian an hlan a ni.

PHQ junction atang hian Baton hi infiammi leh sorkar official-ten tlanpuiin, local ground-ah Chief secretary Lalthar kut atangin CM, Neiphiu Rio-an a lo dawng a ni.

Local ground-a pungkhawm mipuite hmaah, CM chuan Queen’s Baton Rely team-te chu a lo lawm thu a sawi a, an state chhunga ni thum chhung tlanpui a ni tur chu lawmawm a tih thu a sawi. Rio chuan Baton Relay chuan Nagaland thalaite, infiamna lama tihtak zeta ke pen turin an rilru a kaihthawh sak ngei a beisei thu a sawi.

CM hian CWG 2010 organizing committee chairman, Suresh Kalmadi thuchah a chhiar chhuak nghal bawk. Hemi hnu hian Tuophema lama tlanpui turin, Queen’s Baton chu Youth Resources Sports (YRS) Secretary, Bendang Longchari hnena a hlan a ni.

Nimin khan Baton hi Tuophema atangin Khonoma khuaah tlanpuiin, Kohima-ah tlan luhpui leh a ni ang.

Tags: Kohima, Queen's Baton Relay