CBI-ten Gujarat Minister hling dawn

By News Editor on July 24th, 2010 under National News
Central Bureau of Investigation (CBI) chuan Gujarat Minister of State for Home Amit Shah- an Sohrabuddin Sheikh inkahna lem thubuaia kohnaah inlanna hun atana hun tam zawk a dil chu a phalsak lo. CBI hian Amit Shah hi an man ngei dawna a lan avangin Amit Shah ukil chuan anticipatory bail a dil nghal.
Nimin chaw hmalam khan Amit Shah hian CBI hmaa a inlanna turin hun pekbelh a dil a, a ukil Mitesh Amin chuan, ‘A thubuai hi a rei (old) tawh avangin Amit Shah chuan hun tam zawk leh zawhna an zawh turte a dil lawk a ni’, a ti. CBI hian Amit Shah manna thu pe turin Ahmedabad-a CBI court-ah an dil nghal bawk.
Hetih lai hian BJP chuan sawrkar chu eptute tihbuai nana CBI hmangsualah an puh a, New Delhi-a press conference-ah BJP hruaitu un Sushma Swaraj chuan, ‘Hetia Sohrabuddin thih thubuaia CBI-in Amit Shah an ko hi CBI hman sualna kal zela a hnuhnung ber a ni’, a ti.
Press conference-a thu sawi vetu BJP hruaitu un bawk Arun Jaitely chuan UPA sawrkar chu anmahni remchanna atana CBI hmang sualah a puh bawk a,hetia Gujarat-a BJP minister CBI koh hian an boruak a tichhiat avangin Prime Minister-in a tih thin dan anga parliament fur inkhawm dawna chawchhun a buatsaih thinah chuan BJP chu an tel dawn lo a ni a ti.
Hetia Prime Minister chawchhun buatsaiha an tel theih loh tur hi Prime Minister’s Office leh Finance Minister Pranab Mukherjee an hriattir tawh thu Pi Sushma Swaraj chuan a sawi. Mahse, an ngaih thupuisak lo niin a sawi.
Nimin piah khan  BJP hruaitu lawkte chu L.K.Advani chenna inah an inhmukhawm a, CBI-in Amit Shah zawhna an zawh tur chungchanga party-in tan a lak dan turte an sawiho a ni. Amit Shah hi Gujarat Chief Minister Narendra Modi hnaivai (close aide) a ni a, CBI hian ningani khan an hnena inlan turin tumhnih an ko a ni.
Kum 2005 November thla khan Sohrabuddin chu Ahmedabad khawpui pawn (outskirt)-ah kah hlum a ni a, a nupui Kauser Bi pawh a hnuah kah hlum a ni bawk a. Khatih lai khan Gujarat Anti Terror Squad chuan Sobrabuddin chu Narendra Modi thah tumtu terrorist a ni an ti a. Kum 2007 khan Gujarat sawrkar chuan Sobrabuddin leh a nupui chu dik lo taka thah an ni a ti (admitted) a ni.
He Sohrabuddin thah chungchangah hian Gujarat police officer senior tak takte chu tualthah, inphiarrukna sual leh inhruaibo (kidnapping) thubuai vangin jail-ah an awm mek a ni.
Amit Shah chuan chanchinbute hnenah thu chhuahin engmah tihsual a nei lo a ti a, CBI hian amah chuan thil sual a tih fiahna (evidence) an nei lo a ni a ti. Mahse, CBI chuan Anti Terror Squad ten Sohrabuddin an man khan amah thattua puh police-te chu Amit Shah nen hian an inbia a ni an ti. Chung police-te chu DIG DG Vanzara te, Crime Branch-a hotu Abhay Chudasama te an ni an ti.
CBI chuan Gujarat leh Rajasthan police officer-te chuan Sohrabuddin leh a nupui Kauser Bi leh mi dang pakhat chu Tulsiram Prajapati chu bus-in kum 2005 khan la chhuakin Ahmedabad Farm House pakhatah an kalpui a, chuta tanga lakbo niin Sohrauddin chu thah a ni a, a hnuuah Kauser Bi pawh thah velah a ni an ti. Farm House-a Kauser Bi veng tura tih nia sawi Inspector NV Chauhan chuan Vanzara hian Amit Shah hnen atangin telephone call a dawng a, Kauser Bi chu a ruang hmuh chhuah loh tura thah tur tiin thu a dawng a ni a ti.
Kum 2006-ah Prajapati chu inkahna lem dangah thah leh a ni a, heng police officerte bawk nen hian Home Minister chu inhnaitakin an awm a ni an ti a. Sohrabuddin thih thu chhuitu officerte chuan CBI hnenah Prajapati thusawi chu Shah Amit thuin record loh a ni an ti a, a hnu chawlhkar hnihah Prajapati chu thah a ni veleh ta a ni.
Supreme Court chuan Sohrabuddin thih thubuai hi CBI chhui turin kumin January khan a ti a, chumi hma chuan Gujarat Police Criminal Investigation Department-in an chhui a, Supreme Court chuan state CID hian an chhui tha tawk loin a hria a, CBI chhuitirin tun thla tawpah report thehlut turin a ti a ni.
Tags: ,
Share on Facebook
Share on Twitter

Related Posts

Write a comment on this story:

You must be a registered member and logged in to post a comment. Not a registered member? Click here to Register now. You can also post a comment in the Forum.

About

Recent

Popular

ZawlaiDi is the widest read Mizo teenage magazine published in Aizawl, Mizoram state in the North Eastern India region. It is subscribes by the Mizos all over India, Myanmar, Malaysia, Singapore, Nepal, United States etc. It mainly deals with relationships, romance and other inspiring stories. It's main features, the romantic true stories hooked many fans. Since there is no other publication of it's kind in the Mizo society, newly wedded and young couples never missed even a single issue. Enjoy reading our Online Publication through this site. All the best!