Ngaihven Hlawh Spanish La Liga
English Premier League hi ram khata Club te intihsiaknaah chuan khawvel ngaih-hlut leh sum hrawm pawh na ber a ni a, a thawm pawh mitdelte mai nilo, bengngawng te hriat tham khawpa ring a ni reng a nih hi. Amaherawh-chu, Premier League kan ngaihhluta, kan hriat 
chian em em lai hian he Premier League hi skill sang tak tia sawi tur chu a ni miah lo. Skill aiin tharum a langsar zawk a. Ground ball mawi tak taka chawhkual aiin long ball, pet kan luah luah a, vawk chhuak um taka um hum hum a goal thun a langsar zawk bawk. Chutiang chu kan ngaihhlut leh kan hriat lar zawk a nih lai chuan kan sawi Laliga erawh hi chu tharum aia skill lansarhna hmun a ni thung a, ball thiam tak takte an langsar zawk thin thung tih chu FIFA Footballer of the year chawimawina sem thin hian a ti chiang viau awm e. He chawimawina dawngtu tam zawk chu Laliga Player te an ni thin miau va.
La Liga a inel team hrang hrangte khel hi a class a sang thei hlawm hle a, football tak tak ngaina tu tan chuan an khel hi hmaih mai mai phal chi a ni lo. He La Liga-ah hian team lian leh ropui tak pahnih; Real Madrid leh Bercelona an awm a, he team ropui pahnih hian kum dang zawng aiin tun season hi khawvel ngaihven an tihlawh thar lehzual nghe nghe.
Kan hriat angin Real Madrid hi Europe a champion ngun ber team an ni a. Khawvel Club hausa leh ropui ber nihna chelh reng tute an ni. Anni hian an mi duh tawh chu an hlah mai mai ngai meuh lo. Kumin hian 
FIFA Footballer of the year 2007 nihna dawngtu Kaka chu footballer manto ber niturin an lalut te te a. Chumi hnu lawkah FIFA Footballer of the year 2008 nihna chelh mektu C. Ronaldo chu Kaka record khum turin an han la lut leh hmiah bawk a. Chumai pawh a ni lo, Liverpool duh ngawih ngawih lai Alonso chu an chhuhsak hmak bawk. Chu mai pawh a ni nem, Club lian zawng zawngte it rawn Benzema pawh an la lalut bawk mawle. Heng an mi lakluh hrang hrangte ngawt pawh hian La Liga hi kum dang zawng aiin an mipui an hip nghal pang mai.
Real Madrid an inlak thar thur thur lai hian Champions League nomawi Manchenter United sawpa kawl mek Barcelona pawh an lo diau bik hauh lo. Forward tha ber pawla ngaih, Ibrahimovic chu an lei mai bawk a. An inla thar tam lo nain an neihsate hi nomawi chawi a, hlawhtlinna hrang hrang chang tur chuan tha tawk hle-ah an inngai hmin hmak a, an elpui ber an inleithar fe pawhin,’kan hneh leh tho ang’ tih rilru pu chungin thlamuang takin an thuthluang diai diai mai. Nia, mimal chawimawina hrang hrang dawng ngei tura ngaih Lionel Messi meuh pawh lungawi leh thlamuang fahrana siam thei tu hi an chhe hlawm tawp hauh lo. Henry, Xavi, Inesta Etc…te hi tu innge dah nep thei ngai ang le? Real Madrid hi player ropui nei an ni a, Barca erawh team ropui nei an ni thung.
La Liga champion tur inrinsiak ta ila Barcelona leh Real Madrid khum thei tura rin kan nei hlawm in a rinawm lo. An ni team pahnih hi inel ber tur an ni chiang a. Anni team hnih vang bawk hian kum dang zawng zawng aiin La Liga hian ngaihven a hlawh thar a, football lover te mit fukna ber a nih phah bawk. Team ang in nasa takin an inela, englai pawha khaikhin leh chungnun inchuh reng an ni.
Chutiang chiah bawk chuan Messi leh Ronaldo hi tunlai football khawvela mite khaikhin hlawh leh mi mit fukna ber an ni bawk a. A lang apauin chungnun an inchuh nasat zia hi tilang chiah lo mahse, a pahnihna nih chu englai mahin an duh in, an tum ngailo kumkhua ang. Tu team zawk nge dingchang a, tu player zawkin nge mimal chawimawina dawng hnem zawk ang tih hi thil hriat chakawm tak a ni.
Anni team hnih bakah hian Sevilla leh Valencia te hi hlauhawm siam thei zual an ni ang. Kan tarlan tawh ang khan Laliga team te hi an skill a sang thei hle a, ball thiam tak tak tia sawi ngam an ni hlawm. Team lian leh hlauhawm an awm ther fur ang bawk hian player class sang tak tak an awm ther fur bawk a. Top-scorer tur inrinsiak pawh khirhkhan tak a ni. Khelh apiang maia goal thun ching dawk lak ang thawthangin goal thun reng mai Messi, David Villa, Ronaldo, Forlan te an awm a. Anni zing atang zet hi chuan he mi hian a thun tam ber ang tih a har talh mai. Chutah Ibrahimovic, Henry, Kaka, Benzema, Higuian, Aguaero leh midang dnag an la awm cheu bawk.
Champion tur rin huai a harsat ang bawkin goal thun hnem ber tur rin huai a har ngang mai. Eng pawh nise, team ropui leh player ropui tak tak, chungnun inchuh reng renga indim baksak lova an han inel vel tur hi hlamchhiah mai mai phal chi awzawng chu a ni lo ang. Mizoram bikah hian kan lo en tlem deuh a ni thei, mahse, chuvang chuan khawvel hian a ngaihven lova, alar lo a ni reng reng lo tih hre tel chungin player che tha tur leh club champion tur inrinsiak chungin i lo thlir zel phawt mai teh ang u.
(Published on December 2009)
