ARKHAWTHIMDAI CHING MIZORAM SAWRKAR

Mizoram sawrkar hian a sawhkhawk tur dawn lawk lova hmalak a ching hle tih hi in hrilh nawn a ngai tawh awm love. Huaisen takin hma a la a, awlsam tak bawkin a thu a sat leh mai a. Thin thi diai a mipuite ‘Amen’ pui thlap theih tur hmalak a nei tlem khawp mai ti ila, kan sawi sual tam pui hauh lovang. Ruahmanna a siam reng rengin chanchinbu leh electronic media te kaltlang a mipui rawn nachang a hre ngai lova. Rawtna pawmawm zawk hrilh hriat an nih theih nan an hmachhawp kalpui turte ziak a lei theihin mipui hnenah an pholang ngai hek lo. A bureaucrat neih tlem te te thu bak a ngaichang ngai hauh lo niin a lang. Hetianga mipui tam zawk emaw zau zawka mi thiam te rawn hauh lova sawrkar inrelbawlna kalpui hi bureaucracy a ni a, democracy kapui dan him dam ber a ni hauh lo tih kan hriat a tha.

Mipui tam zawkte ngaihdan hriat leh an pawmpui ngei a ni tih hriat a nih theih nan public debate te neih nachang kan hre lova. Mahni thuneihna lantir kan tum luat vang emaw, mi chunga leng, mi dang zawngte aia thiam chungchuang leh indah chungnunna avanga mahni thuneihna lantirna tenawm ber chi a ni. Sawrkar kut ke ber bureaucrat-te hi an thiam leh tlin vanga hetiang hna sang leh zahawm chelh thei hi an ni a. Chu ringawt chuan tisual thei lo hulhual an ni tih a tinzawn chuang hauh lo tih an inhre thin lo a ni.

Sawrkar hmalak tawhna tam tak leh an hmachhawp mek thenkhatte chu mipui nawlpui lo inrawlh ve ngawtna chi ni hauh lo te, mipui tam zawk nun khawih nghal chi ni lem lote pawh an ni nual ta ve ang. Mahse, kawlphetha siamna tur tuikhuah, chhiah chi hrang hrang lakna leh mipui mimir nun khawih nghal thil angah te hi chuan kan sawrkar hian zau zawka mipui/mifingte rawn nachang a hriat thuai loh chuan buai leh harsatna an la hmachhawn zel fovang.

A bik takin chhiah lak dan chi hrang hrangte hi sawrkarin a kalpui mai pawh a, a enkawl zui mumal leh thei si lo tih mipuiten an hriat tawh avangin huaisen takin an dodal ngam tawh a ni. VAT lak dan dik fumfe lo te, roadside parking fee leh chhiah thenkhat hi chu mipuite zawh loh nghawngkawl bahtirna a ni tih an han hriat chhuah meuh chuan bureaucrat ho hian an pu (concern minister) te an bel leh ruai a. Anni minister ho pawhin an bureaucrat ho an ko khu ruai zel a. Thu zak leh hnihne tura arkhawthimdai fo tawh lovin kan sawrkar hian kalphung tha leh dik, tlo leh zahawm a neih theih tikah buaina tam tak chu kan la pumpelh chhawm chauh dawn tih hre hlawm teh se. Chutianga fing taka rorel a nih theih nan chuan mipui tam zawkte remtihpuina la tura sawihona zau zawk neih fo hi kan hreh tur a ni ngai lovang.

(Editorial, June 2010)