SEX HLUARNAAH VIRGINITY HLU ZUAL

Mizoram a kohhran lian ber Mizoram Presbyterian Synod kaupeng pawimawh tak pakhat Synod Social Front (SFF) chuan inneih hmaa sex hman chungchangah survey neiin an thil hmuh chhuah chu, Mizo zingah inneih hmaa sex hmang chu 42.27% a ni tiin sex hman a hluar zel tih a nemnghet a. SFF hian pawmlai nei lo zawnglai hlir nge pawmlai neite pawh an hrut tel vek tih hi puanzar a ni lem lova. Mihring 8,91,058 awmna (Census 2001) Mizoramah hian SFF te hian mi 31,202 chauh atangin an survey a. Hei pawh hi Aizawl khawpui chhung mipui cheng mipa 12,4917 leh hmeichhia 13,1482, an vai belhkhawm mipui 2,56,399 (as on 2005 statistic) laia tam te nena khaikhin phei chuan an survey hian a huap zim hle tih a tilang chiang hle bawk. Eng pawh nise, sex hman khawloh a hluar zualna hmun deuhva mite rinchhanin he survey hi an nei ni turah ngai mai ila, chuti chung chuan, Mizote zingah hian inneih hmaa sex hman hi a hluar thar ta hluai a nih loh vek pawhin a hluar thawkhat tawh hle tih a tilang chiang.

Mamit khawpui a neih zawh tak Kristian Thalai Pawl (KTP) khawmpui lian vawi 53-naa report tarlan danin kohhran thalai pawl a inhmang tak takte zinga 38.5% chauhvin Biakin hawnga nupui/pasal an neih laiin a tam zawk 61.5% zetin kohhran dan ang lova nupui/pasal an nei hi thil mak a ni hran lo. KTP report leh SFF survey report-te hian inzawmna an nei lova, Biakin hawng lova innei tih vang ngawtin chutiang mite chu inneih hmaa sex hman vangah kan ngaih sak ngawt thei vek hek lovang. Kohhran thuhmun loh vang te, chhungte inbiak thiam loh vang te, chan mai hlauhna te leh chhan dang chi hrang hrang vangin kohhran dan zawm thlapa Biakin hawng khera inneih hi mi tam tak tan chuan a theih loh ve fo thin tih kan hriat ve a tul.

ZawlaiDi chhiar thangte chuan thurawn hmanga chhiartuten virginity chungchanga zawhna an neihte leh thurawn an rawn beisei atang te a chhatin Mizote zingah hian virginity hian ngaihhlut a la hlawh reng a, a hlu zual tulh tulh zawk dawn pawh niin a lang thei, tih kan hre awm e. Hmanlai kan pi le pute hunlai ang lo takin tunlai Mizo thalaite leh nula/tlangvalte hian virginity hi, a hmei a pa-in, a hlu a ni tih kan hre chiang tulh tulh a. Mipa tam takte pawhin an ngaihzawngte remtihna tel lova sex hmanpui an tum loh thute, hmeichhiate pawhin sex hmanpui loh reng a harsatzia an hriat chian vanga inneih an rawt mai zel tawh thute pawh kan hre awm e. Mizote zingah hian inneih hmaa sex hman hi hluar chho ve zel mah se, nupa tan chauhva siam inpawlna hi inneih hma chuan lo tih ve ngawt chi a ni hauh lo, tih leh, virginity hi hmeichhiate tluk zet bawkin mipa tan a hlu a ni tih hi kan inzirtir tam lehzual a la ngai zel dawn tho niin a lang. Tuna kan dinhmun aia chhe zawk a kan inbarh luh mai loh nan mitinin theihtawp kan chhuah reng tur a ni.

(Editorial, April 2010)