POWER INDAIH TURA HMALA THEI KAN NI

Mahni a ro inrel thei tawh tura State puitling a hlankai kan nih atang pawhin thangkhat lian zet a ral tawh hnu a Power lam a indaih loh reng mai hi, zah nachang kan hre lo a nih pawhin mipui phunnawi nasat luat vang chauh pawh hian mut mawh hnar mawh a neih a tihpuitlin tum nachang kan hriat a hun tawh hle mai. Ram thanmawhbawk leh hnufual chhan pawimawh berte zinga langsar leh kori tu ber chungchanga ram hruaitute an la tuanfum em em reng mai hi thil zahthlak tawpkhawk a ni tih hre thar leh hlawm teh se.

Hmanni lawk khan Dawr a “Zoramthanga i nei em?” tia lei tur an zawh khan dawr kaite chuan Mombati an pe nghal mai thin a. Kum a vei awrh chauhva, “Lal Thanhawla i nei em?” an tih hian Mombati bawk dawr kaiten an hralh leh chur chur tawh tihte an hre ve lo em ni? Solar Lamp, Inverter leh VIP Light chhi pha lo hi miretheite mai an ni lo. Sawrkar mi pawimawh tak tak, mi In luah a khawsa sumdawng thawhhlawk zet zet, ram hmasawnna atana a kil a lung tangkai ber berte pawh Zoramthanga leh Lal Thanhawla an kat nuk tawh tih hi kan ram hruaitute an hre ve lo a nih ngai chuan hrilh bengvartu pawh nei lo khawp hruaitu khawhawi zim tak an ni tihna a ni ang a, thlan tlin nawn leh tlak pawh an ni lo tih hi mipuite ngaihdan a ni.

Ram hruaitu kan neihte zinga kum lama upa filawr lak Brig. Thenphunga Sailo hian vawi duai lo sawiin Power lama kan ram intodelh theihna tura ruahmanna an lo neih tawhte leh an lo kalpui thui-pui-viau chungchang hi thahnemngai takin a tlangaupui fova. Sawrkarna an chelh nawn leh theih theih tak loh vang a tihpuitlin loh kha ni awm takin a sawi a. A hnu a sawrkarna changtu, a bik takin Zoramthanga kaihhruai MNF leh Lal Thanhawla kaihhruai MPCC te hian kum 20 hnu pawh a tihpuitlin ngaihna an hre lo a nih chuan a ngaihna hria rawn leh tihtir nachang hria sela, mifing tih fo thin dana a tithei zawkte tihtira a rah sengtu nih zawk hlauh mai hi politics thilah pawh lungte pakhat a sava pahnih vawm tlak tluk zetin a hlawk zawk ngei ang.

Inpuhmawh tawn ringawt lovin, compensation ringawt buaipui lovin sawrkar hian ram hmasawnna thlen tak tak tur tihpuitlin nan hian a thiltihtheihna hi khauh zawkin kalpui sela. Tunah rel leh dem hlawh mah se, khuarei ngaihtuah chuan an political career atan sul a su thui zawkin a rinawm a. Anmahni leh an political party tan kori a tu zawk ang a, hamthatna dawn tur an la neih rei phah zawk ang.

(Editorial, February 2010)