ZO INPUI DINNA RAMAH ZOFATE THLABAR

Mizoram hi Zofate tana iptepui banna leh kan innghahna Inpui ni turin thisen leh nunna tam taka lei chhuah a ni a. Politics-a hamthatpui tuma inchirhtheh nana hmangtu MNF leh MPCC te thlir dan anga thlir ve thei lo hi sang tam fe kan awm tih a lan chian em em na chu Zo Inpui din a lo ni ta hi a ni. Mizoram hi state a hlankai a nih khan tel ve awm hliah hliah ram leh khaw thenkhat chu rokhawlhna chi hrang hrang avangin chhawk an ni a. Rilru na tak chung pawha kan tih theih bak a nih miau avanga lungawipui chhawm ta mai te tan hlei hlei Zo Inpui kan nei ta hi a lawmawm lehzual.

Rorelna pakhat hnuaia Zofate ralmuanna leh himna tur sawia relna tur hmunpui atana thlan nahawm ber Mizoram ngei maia hetiang hmun pawimawh din a lo ni ta hi a lawmawm viau rualin chu hmunah ngei mai chuan hnam kawhmawhbawl thenkhat avangin Zo hnahthlakte  chu thlabarin kan awm reng fo mai erawh hi chu ngaihthiam a har khawp mai. Vanduai fal bik chu awm ngai alawm. Mahse, politics thila hamthatna duh vanga pawisawi lo nunna la tura ralpui phiar a inphiar a, ran ang maia phil kan ni hi, mahni ram chhung ngeia thilthleng atan chuan a vanduaithlak chungchuang bik a, palzam a ngaia neih mai theih a ni ngai lovang.

Buaina pakhat atanga buaina dang kangkaiin Tuikuk khaw eng emaw zat chu chenna tlak lohvah a siam a. Kiltin atangin tanpuina pawh a lut chawpchilh nghal ruih ruih a. Tuikuk tlan darh leh kawhmawhbawl thenkhat avanga thlabar reng renga awm Mizoram chhung leh Tripura ram lama Zo hnahthlakte thlavang hauhtu kan awm loh bakah buaina siper tuar Mizo khaw eng emaw zatte tana chhawmdawlna leh vehbur khawn a tanpui chungchanga kan thawkmawh leh viau lawi si hi chu a Mizo zia lo hle.

Bible min zirtir angin mahni inhmangaih thiam phawt ila, mi dangte chu kan la hmangaih thiam chhawm ve mai tur alawm. Mahni leh kan chipuite chunga hmangaihna lantir thei si lovin raltlan leh hnam dangte tanpui a chhawmdawl kawnga kan tha a za sek mai hi a dik lo phei zawng a ni hauh lo nachungin a kalh a kim zan lo deuh tlat a ni. Zofa thlabarte thlamuanin tanpui an ngaihna kawngah chhawmdawl hmasa zet ila, chumi hnuah kan chhehvel amite chhawmdawlin kan tanpui zawk tur a ni ang. Zo Inpui kan sakna Mizoram sawrkar leh a chhunga cheng mipui mimir hrim hrimte pawh hian state dang huam chhunga awm Zo hnahthlakte chen bitna hmun bik leh hmanlai ata tawha kan ram ang maia kan cheibawl khuate hi chu an thlavang hauh kawngah te, chhawmdawlna kawngah leh tanpui an ngaihna kawng hrang hrangah mit naute tlukin kan ngai pawimawh reng tur a ni.

(Editorial, January 2010)