Mizoram Motorsports Association (MiMSA) hruaitute chuan nimin khan an President, Zoliana Royte office-ah Mizorama an member bike rider thenkhatte kokhawmin, an kal zel dan tur leh bike intlansiak an hmachhawn leh turte an sawiho.

MiMSA hruaitute chuan, Mizo bike khalh thiam tun hnaia phaia zuk chetha tak takte leh, an la tirh leh turte chu motor racing lama Mizo thalai, naupang zawkte kawng sâttu an nih thu an sawi a, naupang zawkte tha zawka an chherchhuah theih nan ‘catch them young’ policy an kalpui ve dawn a, chumi hnuaiah chuan naupang kum 14 hnuai lamte tan BMX khalh atangin an tan dawn tih an sawi.

Khawlaia bike-a chetsualna a awmin MiMSA rider an ni em tih an ngaihven vat thin thu sawiin, nikuma bike intlansiak buatsaih hmasak ber atang kha chuan khawlaia bike chetsualnaah an rider-te an tel ngai mang lo tih an sawi a, “Organised racing hi a him a, street racing hi a him lo hle zawk a ni,” an ti. MiMSA hian SIDVIN-FMSCI National Racing Championship, Madras-ah tum hnih mi an tir tawh a, an che tha thawkhat viau tih an sawi. SIDVIN-FMSCI National Racing Championship hi series panga a ni a, kumina series pathum hmabak la awmah rider intirh leh an tum tih sawiin, July 31 leh August 1-a series 3-na neih turah rider panga tirh an tum.

Kumina Nagaland-in Hornbill Festival an hman hunah December 1-ah Hornbill Rally neih a ni dawn a, chuta tel tur chuan sawm an nih angin, tel ve an tum tih an sawi a; he rally-a Mizo thalai tel duhte tan MiMSA-ah ngaihven theih a ni.

MiMSA hi State Sports Council-ah official-in la inziak lut lo mah se, Council hian a pawm lailâwk tawh a ni.