Mizoram Education Reforms Commission Report thehlut

Mizorama zirna kalphung tihchangtlunna tura din Mizoram Education Reforms Commission chuan nimin khan I&PR Auditorium-ah inkhawm pawimawh tak buatsaih ah an Report chu Mizoram Chief Minister Pu Lalthanhawla hnenah an thehlut ta.

Report thehluhna inkhawm Education Minsiter Pu Lalsawta kaihhruai ah hian  Education Reforms Commission members te bakah Assembly Speaker, Deputy Speaker Council of Ministers te, Parliamentary Secretaries, Chief Secretary leh Sawrkar mi pawimawh engemaw zat an tel a ni.

Commission Report dawngtu Chief Minister Pu Lalthanhawla chuan Commission Chairman Dr A.K. Sharma leh a thawhpuite chungah an thawhrimna chu fakin Commission hi rinna nghet tak nei chunga June ni 9 2009 din a nih thu a tarlang a. Thla sawmpakhat chungah Report felfai leh belchian dawl tak an peih fel chu lawmthu a hrilh a. Chief Minister chuan Mizorama zirna kalphung chu a pumpui thu in khawvel zau zawk nen thlirin hmasawnna tur kawng tam tak a la awm avanga,Commission hi din a ni a ti a.

State dangah  hetianga Education Reforms Commission hi din an la awm ngai lo thu sawiin Pu Lalthanhawla chuan report tha tak peih fel thei Commisson Mizoram in a nei hi a lawmawm hle a, chuvangin  report  hi Prime Minister  leh UPA Chairperson pawh  pek an ni ang a ti. Report in a tarlan rawtna te chu bawhzuia tih puitlin an nih chuan Mizoram kalzelna turah rah duhawm tak  a ni ang a ti. Zirna hi hmasawnna bul innghahna leh Mizo nunphung khaichhuaktu tur a nih thu , Chief Minister chuan a sawi bawk.

Inkhawm kaihruaitu Education Minister Pu Lalsawta chuan vawiin programme pawimawh tak hi  Mizorama zirna siamthatna tura ke pen tanna ‘Ni’ a nih avangin  lawmthu a sawi a. Commission Chairman Prof. A K. Sharma pawhin Report khaikawmin a ngaih pawimawh langsar zual deuh deuh te a hrilhfiah a. Commission kalphung tihtur bituk chu huam zau tak pre-school atanga higher education huap vocational leh professional zirna tel vek a nih thu sawiin  heng atanga zirna tha zawk leh mi hmantlak chherchhuak tura rawtna siam chu an tum ber a ni a ti.

Commission Member Secretary Prof. S Homchaudhuri chuan lawmthu sawina hmangin inkhawm hi a tin a ni.

Inkhawm zawhfel hnu hian Education Minister leh Commission member te hian I&PR Auditorium ah tual chung thuthar lakhawmtute kawmna a nei zui nghal a. An thu hriat duh zawhna hrang hrang engemaw zat hrilhfiah an ni.

Tarlan tawh thin angin Education Reforms Commission hi Mizoram sawkarin  din in. Nikum June ni 9 khan Chief Minister hian a lo hawng tawh. Commission hi Prof. A. K. Sharma Chairman-na hnuaia Prof. S. Homchaudhuri Member Secretary niin member dangte chu Prof. Ved Prakash, Vice Chairman, University Grants Commission(UGC), Prof. G. L. Arora, Dr. L.N. Tluanga, Rev. Dr. K. Thanzauva, Rev. Chuauthuama, Prof A.N. Rai, Vice Chancellor, Mizoram University, Pu K. Riachho, Pi Esther Lalruatkimi leh Dr. Lalrindiki Fanai te an ni.

Tags: Mizoram Education Reforms Commission Report