Aizawlah hmeichhe inzuar 700 chuang awm

Aizawl khawpui chhunga hmeichhe humsual dai enkawltu NGO pahnih, New Life Society leh Volcomh-in mi 700 vel zet an enkawlte zingah ruihhlo duh vang leh incheina duh vanga sual khura lut an thahnem ber.

New Life Society chuan kumin January atanga July thla thleng Female Sex Worker (FWS) mi 356 an chhin-chhiah tawh. Heng zingah hian khawlaia inzuar (street base) mi 142, In-a kawp chi (home base) 53 leh mobile phone hmanga zawn ngai chi (secret base) mi 161 an awm a, mi 199 erawh an chinchang an la hre chiang thei lo thung.

FWS enkawl mek zingah mi 55 in damdawi an ti thin a, an zingah HIV possitive 11 an awm. Volcomh pawhin kumin chhunga an target 400-ah mi 442 an ziak lut tawh a, mi 412 thisen an endik tawh zingah HIV possitive 66 awmin an zinga 2 hi an boral tawh nghe nghe. An zinga mi 128 te chu inchiu thin an ni. Heng hmeichhia te hi kum 18-24 inkar an ni tlangpui a, an zingah hian kum 13 mite pawh awmin, kum 40 mi chu a upa ber a ni.

New Life Society-in an enkawl mek zingah hian thingtlang lam mi 46 an awm a, Aizawla cheng nghet mi 248 an awm thung. Heng inzuar thinte hian an hming thlak an ching hle a, a thente chuan an kawppuite atanga pawisa la nghal lovin an mamawh hunah pawisa leh thil dang hmangin an inkawpna man hi an dil leh mai thin niin an sawi.

FSW te hi ruihhlo duh vang, incheina duh vang, chhungkaw kehchhia, retheihna, awm tha duh lo ve hrim hrim leh pasal then vanga humsual dai an ni tlangpui a. A thente phei chu phai lama inhlawhna nei tura mi thenkhatin an bum chhuah avanga mipat hmeichhiatnaa tlu lut a, tal chhuak leh thei lote an ni hlawm. Hnathawktute chuan a langsara inzuarte chu hriat an awl laiin a ruka inzuar ‘secret base’ te chu hriat an har thu leh mi pangngai tak tak an nih avangin an fimkhur hle thin niin an sawi.

Franois-Xavier Bagnoud (FXB) chuan Men having with Sex Men (MSM) tia an sawi mipa leh mipa inkawp an enkawl mek mi 280 vel zingah tuai ni lo, mi pangngai tak tak pawh an awm tih an sawi a, mipa leh hmeichhia in sex an hman aiin MSM atang hian inpawlna atanga natna kai theih ‘sexualy transmitted diseases’ (STD) pawh kai a awlsam zawk niin an sawi bawk. Heng mite hi kum 15 – 40 vel an ni tlangpui niin a zirchiangtute chuan an sawi bawk a ni.

Via Lawrkhawm

Tags: Aizawl, VOLCOMH