Queen’s Baton lawmna hun hmang

Ruahman lawk angin Commonwealth Games vawi 19-na atan a Queen’s Baton Relay chuan vawiin chawhnu dar 3:45PM khan Relay tanna hmun tur Bawngkawn Junction a lo thleng a. Dar 5:10PM ah Vanapa Hall-ah Mizoram Chief Minister Pu Lalthanhawla chuan lo dawngin a puala inkhawm neihpui nghal a ni.

Queen’s Baton Relay Reception Committee Chairman, Mizoram Chief Secretary Pu Vanhela Pachuau chuan inkhawm kaihruaiin Relay Team Member te leh kalkhawm mipuite lawmna thu a sawi a. President, Mizoram Olympic Association leh Vice-President, Indian Olympic Association ni bawk Chief Minister Pu Lalthanhawla chuan Commonwealth Games XIX puala Postal Department-in Stamp an siam ‘First Day Cover’ chu a tlangzarh a. He First Day Cover-ah hian Cheraw kanlai lem a chuang a ni.

Khuallian Pu Lalthanhawla chuan Queen’s Baton-in Aizawl a rawn thleng chu thil ropui tak leh Mizoram chanchina thil chhinchhiah tlak a ni tiin Commonwealth Games chuan inunau tawnna mai bakah hnam chi hrang hrangte inpumkhatna a tilang a ni a ti a. Sports chuan ramri a nei ve lova, mitin an leng vek a ni tiin sports in hma a sawn tur chuan inthliar hranna tel lovin, hnam hrang hrang inkara inngeih tlang taka thawhho a tul thu a sawi.

Chief Minister chuan Rajiv Gandhi Sports Stadium sakna tur atana sum mamawh belh chu Sawkar laipuia a thlen tawh thu sawiin Lammual-ah astroturf phah tur chu tih fel a ni tawh thu sawiin thla thum chhungin hna zawh a beiseiawm thu a sawi. Organizing Committee, XIX Commonwealth Games in Opening Ceremony-ah Cheraw kan turin Mizoram an sawm chu lawmawm tiin tihhlawhtlin ngei an tum  thu Chief Minister chuan a sawi tel bawk a ni.

Pu Lalthanhawla chuan Sawrkarin sports tihchangtlun zel chu a thiltum pawimawh berte zing ami a ni tiin hemi atan ‘Catch Them Young Policy’ te chu kalpui mek a nih thu a sawi. Mizoramah thalai infiammi leh sports hmasawnna tura thawktu zawng zawng ten he hun hi tan lak thar nan leh anmahni tiphurtu nise a duh thu a sawi.

Queen’s Baton Relay-ah Team Leader leh Director ni bawk Col. Kuldeep Singh Banshtu pawhin he meichher kenga ram state hrang hrang an tlawh kual dan chanchin te mipui a hrilh a. XIX Commonwealth Games mascot ‘Shera’ pawh mipui hmaah inlanin he inkhawma kalte lawm a hlawh hle a ni.

Hemi hma hian Bawngkawn Junction atangin Vanapa Hall via Sikulpuikawn thleng, Queen’s Baton hi mi 81-in he meichher inhlanchhawgin an tlanpui a. Meichher kenga tlanpui te zingah hian Assembly Speaker Pu R. Romawia, Assembly Deputy Speaker Pu John Rotluangliana, Transport Minister Pu P.C. Zoram Sangliana, Sports Minister Pu Zodintluanga, Sports Secretary, D.C leh S.P. Aizawl, bakah Sports Minister hlui te, Sports Association hrang hrang, YMA, MHIP MUP, MJA leh MZP hruaitute, HQ 23 Sector Assam Rifles-ah an hotute, infiammi tunlai leh rual u zawkte, coach te bakah Sports Department mi leh sa te an tel.

Baton hian vawiin hian Kolkatta panin Mizoram a chhuahsan ta.

Tags: Lalthanhawla, Queen's Baton, Vanhela Pachuau