Aizawlah leimin vangin thihna thleng

Nizana ruahsur nasa avang khan Aizawl veng hrang hrangah lei a min a, hriat theih chinah leimin vang hian In 3 a hnawl a, mi pahnih thiin, hliam pahnih chu damdawi Ina dahluh an ni.

July ni 28 zan dar 8 vel atang khan Aizawlah ruah nasa takin a sur a, he ruah sur avang hian Zemabawk North field Damvengah in pahnih chu lei minin zan dar 11.00 vel khan a la a, mi pahnih an thi.

Nizan vek khan Tuikual North-ah chenna in pakhat chu ruahsur avang hian a chhia a, mi pasarih an hliam bawk. Aizawl Zotlang vengah in pakhat a chhia a, kawngpuiah tlain thi leh hliam an awm hriat a ni lo. Lunglei, Champhai, Serchhip, Biate etc. panna kawng chu Berawtlang thlang lawkah lung chimin a hnawh bawk. Hei bak hi chhiatna hrang hrang a thleng nual. Ruahsur hi zinglam dar 5.00 velah a han a ni.

Nizan dar 11:15 vel khan Zemabawk North huamchhunga In pahnih chu leiminin a hnawl a, mi pahnih an thi. Hliam na lutuk tuar an awm lo a, leiminna bul velah hian lei khi ala awm avangin a bulhnaia chhungkaw 10 vel chu an inthiarchhuak a ni.

Zemabawk North Branch YMA president R. Lalnghakliana hnen atanga thudawn danin leiin a hnawl In hi Lalhmingmawia leh Krosslalnunmawia te ta niin an ni hi chhungkaw member 6 ve ve awmna an ni a, Hmingmawia In hnuai hi chhungkaw 2-in luahin a phel lehlama awm te hi a vanduai ber an ni a, khum khata mu VL Malsawmtluanga (19) s/o Vanlalringa, Kawrthah leh Timothy Lalhmingtluanga (18) s/o F. Lawmzuala, Zemembawk te chu lei hian chhilhin tukin dar 3:30 vel khan an ruang hi phawrh a ni.

Malsawmtluanga hi a u-te nupa nena khawsa an ni a, Timothy-a te nen hian chhungkhat niin Malsawmtluanga te Inah hian a riak zauh zauh a, nizan pawh hian a riak phei a. Khum khata mu an ni. Malsawmtluanga pa hi Forest Guard niin Kawrthah-ah hian a ruang hi phurhthlak a ni.

Vawiin khan Zemabawk North khawtlang chuan In tlu senghawi hna hi an thawk nghal a, leiminna bulah hian lei khi ala awm avangin chhungkaw engemawzat chu an insawnchhuak a ni.

Nizan dar 11:20 vel khan Tuikual ‘C’ Mual-a C. Neihthanga In luah lai assam type chu a chhaka raw bul hung tawlhin a delh a, a thlanga Zomuana In bulah hnawl thla in In chhunga awm mi 7 zinga 2 chu an hliam a nat deuh avangin damdawi Inah dah an ni.

Tuikual North YMA Asst. Secretary Lalzuiliana hnen atanga thudawn danin C. Neihthanga te chhungkua hi member 6 niin mikhual pakhat an nei bawk a. Neithanga fate Lalruatfeli (10) chu a lu leh awmah hliam tuarin Malsawmdawngliana (12) chu a ban ruh a tliak bawk a, midang te hi chuan hliam na nei loin first aid pek an nih hnuah chhuahtir lehnghal an ni. In chhung bungrua a chhe deuh vek niin a sawi. C. Neihthanga te chhung hi VC House-ah awmtir rih a ni a, tukin khan YMA chuan vengchhungah vehbur khawn nghal a ni.

Tukin dar 1:00 vel khan Zotlang huamchhung, Vaivakawn Zohnuai chungzawna assam type In, Lalkhama, Sialsuk ta, chhungkaw hnih luahlai chu a chhak lam lei tawlhin a hnawl tlu bawk a, bungrua engmah an chuh hman lo. Thudawn danin In luahtute hian zan dar 10:00 vel atangin an hlauhthawn an nei tan tawh a, zan dar 11:00 velah an chhuahsan fel hman a ni.

By Zova Tlau