Queen’s Baton in Aizawl lo thleng

Commonwealth Games vawi 16 na tur Queen’s Baton (Meichher), khawvel hmun hranga kalpui mek chuan Mizoram, Lengpui Airport vawiin chawhnu dar 2 khan a rawn thleng.

He Meichher danglam taka siam hi Aircraft atanga a lo chhuahin Pu Zoliana Royte, Director of Sports & Youth Services chuan lo la in, Pu Vanhela Pachuau, Chief Secretary, Govt. of Mizoram hnenah a hlan chhawng a. Pu Vanhela hovin a lo hmuaktute hian Airport Terminal lamah an tlan luh pui a ni.

He Meichher hian India ram a awm chhung chuan India hnam puanzar rawng angin eng a chhuah a, a bulhnaia kalte leh mipui lo hmuaktute thla a la vek thei a, hei hi Commonwealth record ah an hmang tel thei dawn a ni.

Commonwealth games India ramah a awm vawi khatna tura a Meichher-in Aizawl, Mizoram a rawn tlawh hi a lawmawm em em a, a hmuaktu mipui ten an lo lawm hle a ni. Sports lam hotu, Minister lo ni tawh hrang hrang te, Sports hrang hranga mi hmingtha te, NGO hruaitu, Mizoram Olympic lam hotute leh MJA President te pawhin he Meichher hi inken chhawkin Bawngkawn-Ramhlun-Chanmary, Zarkawt, Dawrpui, Treasury Square, Upper Khatla, Sikulpuikawn, Zodin Square, Vanapa Hall an tlan pui a, a tawpna ah Sports Minister Pu Zodintluanga chuan lo dawngin Chief Minister Pu Lal Thanhawla hlanin, CM ho hian Vanapa Hall-ah inkhawmna an neihpui a ni.

Tags: Queen's Baton