VL Ramhluna Bail in chhuak

Tanhril V/C member, Lalpiangliana thihna avanga police suspend palite zinga mi, VL Ramhluna, OC, Luangmual Outpost chu nimin khan Court-ah a inlan a, Court chuan thla khat chhung atan interim bail-in a chhuah.

VL Ramhluna hian Court-ah hian jail-a táng turin a hriselna a tha tawk lo tih ziahna doctor lehkha a nei a; hei vang hian Chief Judicial Magistrate, R Vanlalchami chuan thla khat atan interim bail-a a chhuah a phalsak a ni.

Chief Judicial Magistrate chuan, doctor a nih loh avangin VL Ramhluna damlohna lehkha chu a dik leh dik loh a hre lo tih a sawi a, medical certificate petu chu Aizawl Civil Hospital doctor a nih avangin, Civil Hospital Medical Board-in thla khat chhungin an lo endik nawn leh dawn tih a sawi a ni.

VL Ramhluna chu a damlo tak tak a ni tih Medical Board-in a finfiah chuan interim bail chu bail puitlingah chantir a ni ang a, a damlohna finfiah a nih loh chuan jail-ah khung tur a nih thu, Magistrate chuan a sawi a; Interim bail intan hun hi police dang parukte intemrim bail-a an chhuah tan ni, July 22 rin ve tur a nih thu leh, an medical certificate pawh a kal kawp vek dawn tih a sawi bawk.

Tags: VL Ramhluna Bail in chhuak