Khawnglung Run Film chan zo fel ta

Fûr khawchhe hnuaiah Mizo film hautak leh senso tam ber tura ngaih ‘KHAWNGLUNG RUN’ film shooting chu zawhfel a ni ta.He Film-a senral zawng zawng hi a pawisa fai chuan cheng nuai 7 chuang tura ngaih a ni a, hei bakah hian mi thahnemngaite`n tha leh zung bakah hmanrua, lirthei leh thil tul dang tam tak an thawh bawk. Khawnglung khua atan hian In sawmthum vel sak chawp a ni a, heng Inte hi halral leh vek an ni. Tin, he film-ah hi-an mihring 300 atanga 400 vel lang tura ngaih a ni.

He Film shooting chhung hian buaina tam tak an tawk a, Tuilian, zum leh hriam kara shooting hi neih thin a nih avangin intihpalh avanga hliam tuar engemaw zat an awm a, he film-a changtute zinga mi, role pawimawh tak nei pakhat, shooting chhunzawm thei lo khawpa Damdawi Ina zai ngai a awm avangin hun eng-emaw chen shooting pawh a khaihlak phah nghe nghe a ni.

Shooting hi Motor leh khawl thil ri velin a tihbuai a rem loh mai bakah background-a a hunlai mil lo thil a lan a rem loh avangin Ramhnuai hla tak takah ke a hmanrua inthiar chawpin neih thin a ni. Lunglei khaw chhehvel bakah Thenzawlah te, Vanva lui, Mat lui leh Tlawng luiah te shooting neih a ni a, Lui tuilen lai a nih avangin fimkhur a ngai em em a, venhimna lam pawh uluk taka buatsaih a ni.

Dt.13.07.2010 Thawhleh zan khan he Film-a Scence shoot hautak ber tura ngaih ‘Khaw hal scene’ chu Zan dar 8 vela tanin; a tuk zing dar 10 velah zawhfel hram a ni.

A hma ni chiah 12.7. 2010-ah nilengin he scene hi shoot dan tur uluk taka buatsaih leh zirchhin a ni a, a tuk 13 zanah mi 100 vel shooting a tel turin an thawkchhuak a, vanneihthlak takin hemi zan hian ruah a sur lo hlauh a, tluang takin shooting hi kalpui a ni.

Tunah Leitlang Pictures Studio ah editing hna tan turin an inbuatsaih mek a, cut edit mai bakah graphic leh effects tam tak siamchawp a ngaih dawn avangin edit hun chhung pawh a rei phah dawn a, September emaw October vela release hman tum a ni.

Tags: Khawnglung Run, Leitlang Pictures