Aizawl mipate star rawn Lawmzuali Khiangte

Hmangaihhlima

Tun hnai lawkah Music video pahnih; ‘Ka ngai em che’ tih leh ‘Hring chan chhung chuan’  tih a siam atanga lar thar hluai a, mite hriat hlawh leh mipate star thar em em Lallawmzuali Khiangte hi K. Lalvuta (L)  leh Hmingthanzauvi Hnamte te fa pali zinga a tlum ber atan ni, 8 Oct,1992 khan Aizawl civil Hospitalah a lo piang a. Tunah hian a nu hovin Hrawva Colony, Venghlui ah an khawsa mek a. Aizawl mihlun leh lar Hrawva a thlah, a tu chhuan kal zel a ni nghe nghe .

Lawmzuali hi pian thiam tak mai a ni a, Mizo nu ah chuan hleitling pawl tak niin kum 18 leka upa a la ni chung hian ft.5.6 ngawta sang, inkhaithli zarh mai leh hmeltha fahran mai a ni. No lutuk lo, hang bawk silo, vun mawi tak nei a ni a. A sam dum hlap leh sei hnalh mai chu a mawiin amah pawh a tihmuhnawm lehzual hle.

Idol star Lawmzuali

Zonet in kum 2009 a Idol thlanna an neih tum khan inlan in top 20 a inhlangkai a. Chu chu zoram khawvel hriat hlawh a nihna chhan a ni. Idol-ah hian thleng sang lutuk lo mahse, mite hriathlawh leh lar ber pawl tunthlengin a la ni reng a. A bikin Aizawl rawltharte star rawn a ni.

He tleirawl hmeltha leh zaithiam Lawmzuali hi Daduhi nau(Cousin) a ni a, zai lamah na na na chuan chhun tur a nei tha hle. Chhun tur nei tha hle mahse, mipui hmaah tak chuan a zai har ang reng lawi a. Kum 2008 khan an School sport-ah zaia intihsiakna ah tel ve in pahnihna a ni a, chu chu zaia a zin kawng a zawh tanna a lo ni ta a ni. Intihsiaknaa a tel hma hian Guiter perhte a thiam vangin a thiante zai a remsak fo tawh a, chuta tanga zai lama intatlut chho ta a ni nghe nghe. Guiter perh leh lem ziah nuam ti thei tak Lawmzuali hian a awh em em Guiter mawi tak chu Birthday Present-ah a dawng tawh nghe nghe a, hahipin alawm zia thu a la sawi.

Tleirawl kawm nuam

Lawmzuali hi a kum ngaihtuahin a pumrua a lian a, chutiang chiah bawk chuan a naupan ngaihtuahin a puitling a, kawm a nuam bawk. Tawng duh tak a ni a, nuih a duh hle bawk. Tawng duh leh nuih duh tak a nih ang ngeiin a athian/mipa duhzawng pawh tawng duh leh nuih duh tak a ni bawk. Pasal/ngaihzawng tura a duhthusam chu Palian, thau lo, tawng duh leh nuih duh tak, tawng duh tih vanga mi sawisel hrat chuang hauh silo, rilru tha leh tluang, zaidam ruih mai a ni a. Mipa thau chu a tei thei thak nang.

Hun hmang dik Lawmzuali

Zaithiam vawi engemaw zat kan lo interview tawh a, chung mite nen chuan huntiam/bituk kan nei ziah bawk. Chung zinga mi tam zawk, an zavaiin an tlai vek hlawm a. Beidawn rum rum hnua rawn thleng thei ta tawk pawh an awm nawk, mipuitling tak tak zingah pawh. Lawmzuali erawh hi chuan hun a hmang dik em em teh tlat a, kan tiam ang ngeiin 12 hma in a lo thleng chat a, kan ruahman lawk ang bawkin ahun takah kan zo thei nghe nghe. Hun hman dik ngaipawimawh takte hi an fakawm thlawt a, mizote hian kan zir thar a ngai nasa viau reng a ni. Tin, Lawmzuali hi a polite hle a, han inlakna pawh a nei hranpa lem lo niin a lang. Kan inhmuh hmasak ber hian min chibai turin a kut a lek chhuak hmasa zawk tlat mai a ni. Chibai lawm lawm pawh a min en tha peih der lo zaithiam chibai ngawt ai chuan a hlu in, a nuam dangdai khawp mai. Tin, zai leh interview tura a chhuah dawn reng reng hian a tawngtai hmasa ziah bawk a, chu chuan a nun pawh thui tak vawngin a tha zawngin a hruai nasa hle nghe nghe a ni.

Hla a phuah, mahse….

Piracy a hluar tawh em vanga tih bo huphurhawm tawh hle a ngaitu Lawmzuali hian hla 9 lai mai a phuah tawh a, mahse, a sa chhuak ngam tlat lo mai. Pathian hla 1 a phuah tawh a, lengzem phei chu 8 ngawt a phuah tawh nghe nghe a ni. “Hla pakhat pawh phuah a har mah naklaiin, 9 ngawt mai phuah sak ngam tlat lo ai chu a pamhmai lu deuh lo maw?” kan tih chuan ngaih no bei taka nuiin, ‘’Sak hun te chu ala awm ang chu a ti,’’ a va nghahhlelhawm em!

Chhiahhlawh chei ang thalaite

Mizo thalai, a bikin khawpuia thalaite changkan tawh zia thiam takin a sawi siam siam a, sawi pawh a sawi thiam na rawh. Mahse, chumi karah chuan kan incheina ringawt a changkang a, kan nun leh khawsak a changkang tak tak chuan si loh thu pawh thiam takin a sawi. Incheina ringawt changkan hian kawng ro a su tlem a, ramropui min hruai thlen a rin lem loh thu pawh thiam takin a sawi a. A thalaipuite zawng zawng chu rilru leh khawsak changkan hnu a incheina tih changkan nachang hre hram turin a thiam tawkin a fuih mawlh mawlh.

Zaithiam + fak + sawisel

Mizote hian zaithiamte hi kan fak thiam hle in a hria a. Zaithiamte kan ngaihlu thiam a, dah pawh kan dah pawimawh thiam hle in a hre bawk a, lawmawm pawh a ti. Mahse, ‘Laikinga dawr dum, Laikinga awr sen’ tih ang deuh vin zaithiamte hi kan fal hluak hluak thin, an bula kan awm chuan. Kan hmuh phak loh an an awm erawh chuan sawisel kan hrat leh hle si niin a hre tlat bawk a. Zaithiam tawh phawt chuan rel pawh an tuar nasa bik niin a hre bawk. Mizo ten inrel kan ching lutuk chu veiawm a ti hle bawk a ni.

Lengzem sa zel dawn

Air Hostess nih tum Lawmzuali hian zai chu eizawnna kawng khatah a pawm hmak a. A eizawn hmuhna hnar pakhat a nih tlat avangin Lengzem sak chu sualah a ngai hran lo. A sualna a awm ngawt lo bawk. Sak timna a nei lova, a la sa zel dawn a bawk a ni. Pathian hla satute a zaithiampuite chu rawngbawlna tia tlawmngai tura sawm tu an tam thin avangin an hlawk tur ang pawn an hlawk thei lo mai ang tih hlauhthawnpui chang a neithin a. Rawngbawlna ni bawk mahse, an ei hmuhna hnar pakhat leh pawimawh tak a ni tih hriatthiampui turin mipuite a ngen nghe nghe.

Kum puan ah zu khap

Mizo Kristian ten kan chhiatpui mek leh min tihmingchhe thin tu zu hi namen lovin a haw hluah hluah a. YMA in kum puan atan hmang leh tawh se a ti ngawih ngawih bawk. Kum puana kan neih chhung khan nasa takin khawtlang a ralmuangin, a thianghlim phah a, kan thlah dul tak deuh chinah chuan thawm bengchheng leh intibuai an tam leh tak em avangin khawlai nun pawh hmeichhe tan bik phei chuan a ralmuang leh tawh lo hle a, bakah a tawp tawlh tawlh bawk. Chuvang chuan Zu hi khap ila, YMA ngeiin kum puan a tan hmang leh tawh se, khawng takin khap ngei bawk se a ti a ni.

Lawmzuali Khiangte hian nasa zawka zai lama inhman a tum mek na in, intihsiakna Idol? Icon ang chiah chuan tel tumna a nei tawh lem lova. Tin, Cassette siam pawh a rilruk lutuk lem lo bawk. Chutihlai chuan Music video erawh a theih ang ang a siam chho reng a tum thung. Amah a la naupanga hun tha tam tak a la nei bawk a, he nula hmeltha, pian nalh leh zaithiam ni bawk hian mizote mit leh beng hi a la titlai dawn chauh turah ngai ila, beiseina nen hla hmanga ruai ropui min thehsak tur chu dawhthei takin i lo thlir phawt mai teh ang u.

(Published on June 2010)