ZawlaiDi » Thurawn

Mahni fa hmasa hmangaih harsat

Admin — Sat, 24 Jul 2010 03:35:31 +0000

Kum 18 ka nih in pongsual vang in nau ka paia tuhnen ah mah ka soingam bok si lo. Tun ah cun pasal tha deuh nei in fa 3 kan nei toha tuna ka fate angin ka fa hmasa ka hmangaìh thei lo, ka in ngaihtuah in ka in thiam lo bok si advice min pe teh apa ang ropui si ka enkawl angai sia

Mahni ril a rah fa i hring a, pawngsual vanga fa pai chuan titla duh pawh nila mi zawng zawngin thiam an chan em em tur che a nih laia titla duh lova neiin tunah ka hmangaih thei lo i ti maw? Tih ngaihna ka hre lo, ka pi, ka nu i ni ang tih ka hlau khawp mai. Engahnge pawngsual vanga fa i pai le? Tihtlak theih a ni tih i hai bik awm der si lo. I thiam loh vek a ni a, ka pi, i fa lakah chuan hmangaih i ba tih inhre thar leh teh. Nangmah avanga khaw eng hmu ve a ni a, a puitlin hma chu tuna i pasal laka i fate tluk chiah bawk khan i lak atang leh midang lak atang pawhin hmangaihna a dawng ve tur a ni. Chu chu a dikna chanvo (rights) a ni. Tuna i pasal kha i la hrilh lova, a naute pawhin an la hre lo a nih pawhin huaisen takin hmachhawn la, hrilh la, sawi ho teh u. I phatsan ngat chuan a sawhkhawk tuar turin i rlru inpeih fel lawk sa mai teh. Mi dangte aia tuar hmasa tu chu chhungkhat laina hnaivai an ni a. Nu leh pate hian an tuar hmasa ber fo bawk. I thei ngang lo a nih chuan hnuchham chawmnaah i dah dawn nia.

Thanthi neih hmain rai theih em?

Admin — Sat, 24 Jul 2010 03:34:54 +0000

Thanthi neih hmaa mipa in an pwlin fa annei thei lo antih hi tak2 ani m?no.thupsak teh plz in

Theih e. A theih tehmeuh mai. Mipa chi kha hmeichhe chhul (chi bawm)-ah a luh a, ni 6 chhunga hmeichhe chi nung (egg) nen a intawn fuh chuan than thi neih hma pawhin a rai theih. Hmeichhe than thi neih hma hapta 2 velah hian chi nung (egg) a insiam a. Chi nung an neih hnuin than thi an nei tlangpui chauh thin. Than thi neih hma ni 6 chhunga mipa chi nungin chhul a chhuahsan lohva a thi tlaw mai a nih bawk si loh chuan a rai theih tihna a nih chu. Mihringte hi kan inang vek lo ka tih kha. Thenkhat chu thi an neih hnu kum tam takah pawh an rai mai lova. Thenkhat erawh thi neih hma daih a rai pawh an awm. Dan naranin hmeichhia kum 12 chin chu thi nei thei emaw thi neih hun tawh emaw a ngaih a ni a. Mahse, hmeichhe thenkhat chu kum 12 hmalam a thi nei pawh an awm nual. Thil theih a nihzia tilang chiang em em tu chu kum 5 mi lek Peruvian hmeichhe naupang rai kha a ni a. Ani kha hmeichhe naupai naupang ber record siamtu a ni. Chhan hrang hrang avangin chi nung a insiam hnu pawhin miin than thi a la nei lo reng thei ve a. Chuvangin, than thi neih hi rai theih hun tehna a ni ber lova, a tlangpui thu-ah erawh chuan rai thei lova ngaih an ni.

Thi neih zawh hlim a ni si a

Admin — Sat, 24 Jul 2010 03:33:44 +0000

Tleirwl kum 17 mi ka ni a thla hmasa mai khan ka bialpa tlangval tawh nen kan chesual hlauh mai a ka period zawh atanga ni khatna ciah ania hetiang ang hunah hian a rai theih em th hi hriat ka duh a ka rilru hah lutuk hi chaw pawh ka ei tha thei lo a rai ka la duh bawk si lo khwgaih takin a rang lamin k zawhna hi mn l chhan sak thei ang em?(n0 thup plizz..)

In ti dun tawh a, in zo fel diam tawh a, tlai khawhnu a rilru hah phah nana hman leh si chu a fin thlak loh khawp mai. Engahnge pregnancy test i tih mai loh? Cheng tam pawh seng lovin mahniin zing thawh hlimah a in-test mai theih alawm. Theih tehreng mai. Hmeichhe chi nung lo chhuah hun hi dan naran a chhutna maiah lo chuan a pangngai diak diak vek kher lova. Mipa chi nung leh hmeichhe chi nung a intawn fuh chuan, rai a ni mai. A chhuah hun a inan tlat loh avangin chuti maiin i mimal case bik hi chhan theih a ni lo. Thi neih hlim atang emaw thi neih leh hma ni 14 velah hian hmeichhe chi nung hi chhulah lo chhuakin mipa chi a zawng a. A hmuh loh chuan a thi ve mai thin. I thi neih leh ni tur i chiang lo ang bawkin i chhul a chi nung luh hun tur pawh i hre lawk thei lo tluk a ni. Chuti a nih chuan thi neih hma ni khat lek awmah pawh a rai theih tihna a nih chu. Mahse, test phawt a finthlak ber. I lo rai lo maithei asin.

Thi neih tlem phah, ka rai em?

Admin — Sat, 24 Jul 2010 03:32:54 +0000

Tleirol kum16 k nia gaijwg kneia kan n hmagai em vg n k thiaghlimna cu k hlana..egmh damdwi k eibwk s lova thla hmasa kha cuan thi tlemte k neia mhs atlem lutk a tunthla ah k la nei bwk s lo karai tehi animai lomw k buai tak jet ani k n ceck gam bwk s lo..amah silh tur n kan khua in ag bwk s lo khwgai n mn tanpui hram rwh!pliz n no thup w…..

Mihring taksa leh hriselna a inang lova, rai theih dan pawh a inang vek thei hek lo. Vawi khat inpawl ngawt pawhin a rai theih a, kum 20 chuang innei tawh pawh fa nei lo a awm theih tho thung. Rai dawn a thi tlem neih hi hmeichhe tam tak chunga thil thleng pangngai a ni ve fo. “Tun thlaah ka nei bawk si lo,” i tih hian min tibuai tlat. I la nei lo nge i nei tawh lo zawk? Rai tih hriat harsa tawk chauhva thi neih a, a hnu thla atanga thi hul daih hi an awm fo. Damdawi ei lova CD in hman bawk si loh chuan, a rang lama inenfiah thuai a tha ang. A eng a mah hmaa i tlangvalpa lo hrilh cheng cheng a ngai hran lo. A tul a nih erawh chuan khaw hmun lo tih vel mai mai chhuanlam a tling tur a ni hek lovang. I tihtur hmasa ber chu pharmacy a pregnancy test-na lei a ni mai. Mahnia in-test theih nan zun test-na an tih mai (Mizote hian a hming ang hialin kan hmang bel tawh hlawm a nia) lei la. I zing zun far lut la. A rawng a danglam chuan i rai a ni mai. Minute tam nghah a ngai lo. A ruk a tih a harsa lo.

Kum 6-a upa leh mahni rualpui bialnu thlan zawk tur hre lo

Admin — Sat, 24 Jul 2010 03:31:36 +0000

Tunah hian kum 18 ka ni ve toh a bialnu kei aia kum 6 vela upa ka nei a mhse amah cuan min duh m2 a kei cuan ka kham khop silo ka rualpui lek in min ngaixog ve Tho bok si ticuan ka kop ta a,ka rualpui nu cu ka biak loh cuan keimah hy ka buai vek thin,a upa xok thug eroh ka nig hluah2 thug ka then chuan a rilru a na dwn bok si,ka then loh cuan ka inthiam thei bok silo,tichug cuan kan awm dun fo bok si,mhse kan la chesual m l thug,inruk pui ah te min swm a,i nupui ka ni dawn te a ti bok a,cuan min ring m2 bok si egtin ge ka tih tak ang a naupang xok cu ka duh xok bok si. Numbr thup pliz

Duh zawk i nei tih i hre chiang tawh a, a upa zawk chu then ngei duh khawp a thutlukna i siam fel theih phawt chuan eng aiah nge i then mai loh ang? Inpawlna chungchang pawh ni si lova ka kham khawp si lo i tih awmzia hi ka hre thiam lo. I duh tawk tak tak lova, iai rukna i nei niin ka ngai.

I ning hluah hluah a, in inkawm leh tho thin bawk si. In inkawmnaah lah sex in hmang dun lo chauh a ni mai a, chutiang taka inpawh tawn si chuan i ning em em lawi si a. A chhan ni thei awm chu i kum rualpui bialnu dang i neih vang a ni thei. A upa zawk nena in inkawp tirh khan i lungsi hle a ni lo em ni? I kum rualpui bialnu i neih hma nun kha dawn let leh la, khatihlai khan i lungawi em? I lungawi a nih ngat chuan bialnu i neih vang mai a ni a, a upa zawk kha i hmangaih hle tihna a ni ang.

A tir atanga ning hluah hluah chunga kawm reng i nih ka ring lo hrim hrim. I lungawi thinna kha bialnu i neih achinah a kiam tial tial a. Tunah phei chuan i haw tep tawh hial maithei asin. Eng pawh nise, kum 24 mi nula (emaw nuthlawi pawh nise) chuan tlangval tuaitir nangni ang duang chu an awk tang thiam khawp ang che u.

I kum rualpui i bialnu thar zawk chu i biak loh hlek pawha i buai vek zel chuan, buaina dang insiam tur khawpa i malmak duh ka ring lo. Huaisen takin thutlukna siam la. Chu i thutlukna chu a upa zawk leh a naupang zawk hrilhin sawi pui ve ve la. Na zawk an lo awm a nih pawhin thenna hi inhmangaih leh inngaizawngte inkarah chauh ni lovin thiantha karah pawh a na tho tho tih pawh rawh. Nangmah inngaihtuah hmasa ber la, i nupui tura i duh i bialnu chu i thlang fel thei mai ang.

Bialnute aiin mipa it zawk zel

Admin — Sat, 24 Jul 2010 03:30:39 +0000

Mipa Km 18 ka ni a, ngaìhxog ka nei nual toh a,mahse mpa ka it leh tlat thin a, hmeichhe itna ka nei ngai lo a, ka then phah leh thn a, egtn nge ka tih ang, mahni anpui kop chu a tha si lo tih k hria,mahse insum a har si a, tumah chu ka kop chuang lo a, voi khat kop ila ka sim thei ag em, min lo tanpui teh. from lonliz

THEIH loh a awm lo. Mahse, i dinhmun thlirin tih chhin loh hrim hrim a him zawk ang. Sim thei pawh ni la, i rilruah a riak reng tawh ang a, mahni inthiam lohna i nei kumkhua thei asin. Mahni inchhir lehna tur siam loh mai hi mifing zia a ni. Kum 18 mi chu puitling tura i thisen leh taksa than danglam hunlai tak a nih avangin hetiang harsatna hi i nei palh a ni thei a. Nangmahah khan hmeichhe awn zawngin i thisenin hna a thawk nasa pawh a ni ang e. Eng pawh nise, hmeichhia ngei ngaizawngin kawp zui zel la. Mipa kawp a nakin lawk a inchhirte anga i inchhir loh nan tihluihna nen theihtawp chhuah ngai chi hi hringnunah kan tawng fo tih pawm hmin thlap phawt mai teh. I tisa chakna a lo nasat zual lai chuan Toilet pan mai la, mahni chauhvin thil sual ti kher lo pawhin a tihreh theih tih i hriat kha. Tin, chakna leh itna chhuanlam a hmangin tu lakah mah inawk tang suh. Hmangaihna vang liau liau a ni tur a ni a, a dang chu hmangaihna ken tel lek an ni chauh zawk tih hre rawh. Doctor rawn la, zep nei lovin i harsatna hrilh la. I hormone thunun thei tur damdawi chawh tur an hre khawp ang. Tin, tumna nasa tak nena hmalam pan zel tura huaisenna insiam la, nakinah mipa itna chuan a kian san ve mai ang che.

Bialnu nena zu in dun thin

Admin — Sat, 24 Jul 2010 03:29:17 +0000

Tlagval kum 22 mi kani a,nuthloi kum 34 mi borvel nen kan in gyjog a,kan in hmgyh a kan inhau rga kan inthlah thy boksi lo a.ju te kan indun thna a,ka hmgyh em a vgin ju in th lo tr in kati a a in lui jel boksi a,a in lah hian thk tr rigot ajog kuala hmeice dag ka hmelhriat te ph ka be gam gylo’a egtin ge ka th tak ag khogyhtakin min tanpui hram teh u.omdan tr poh ka thiam lo tak jek a ni.no minlo thup plizz.

Tlangval kum 22 miin nuthlawi kum 34 mi zu in lehnghal i ngaizawng hi mak ka ti tawp thei lo. Engahnge i then mai loh? I kum zah angahte hi chuan beidawn a la hun teuh lo mai si. Nangin zu in lo la, ani pawhin in bik lo sela a ziaawm mai tur. Zu in duh ve reng thin khan i thunun a, a zawm hleithei bawk si lo. Inhmangaihte inkarah chuan thikthu chu a awm ngei tur alawm. Engahnge nang pawhin hmeichhe dang chu i biak fo? Thiante an nih chuan speaker phone-ahte dahin in pahnih khan kawm ta che u. Eng pawh nise, zu ber in nghei dun loh chuan harsatna dang pawhin a la tlakbuak dawn chauh che u tih ring lawk ula, in tinzawn thelh duai lovang. Inhauh leh thinrim tihvel hi chu hringnun ze ken tel zinga pawimawh ber te an ni ve tih hrethiam ula chuan a ziaawm thuai mai ang. Thinrim kher lovin a sawi dun theih a, inhau kher lovin engkim inpawh tawn takin in sawi fel dun thei tih pawh in man thiam thuai mai ang. Mahse, a tu emaw zawk zawkin zu in thlah loh chuan nun hlim in beisei reng thei lovang. In pahnihin nghei ula tichuan nun bul in tan tha dun leh dawn nia.

Thianten nawr, zei loh aiin sex hmang ve mai dawn?

Admin — Sat, 24 Jul 2010 03:28:00 +0000

Hmagaih deuh k nei a,mhse hrst na k nei a,nupui pasl in neihhma a,sex hmn hi k dh gai lova,midag lk a,hmn poh hi k dh gailova,mhse thianten sex hmagve tur in mnti a,ihmndh lh cuan inneih hun h zeilo lutk aga,tn ichi atla hmalutk aga,hmeichia in anduhkhop lo ag ce,cuvag in sex hmagve thn rh mnti a,egtn ge k th dn? K hreh bok si mhse, k hlau bok si egtn ge k th ag,egtn ge k ci atlk hr thei ag khogaihin mnlo hrilh te a,k lom viau ag,no thup sk plizz.

Nupui han nei la, in nu nen chuan lawi that zanah, “Sex la hmang lo ve ve kan ni a, kan nuam tihzawngte inhrilhin kan inzir chawp dun dawn nia tiraw?” han ti ru ser ser mai ula nuam awm reuh. Ngaih a tha thlawt ang. Tin, a hlimawm dangdai hrim hrim bawk ang. Hmangaihnain min phuar hlawm tlat tawh a, hmangaih berte han chul heuh heuh mai hi chuan inneih hnu chu sawi loh, ti dak chung pawhin kut hi rin ai takin a lo hlei hman zel a. Mahnia inzir chi ah chuan zir thiam harsa lo tak leh zei awlsam chi tak a lo ni awm asin. Chu chu mi tam tak tan chuan inchhuih tlukna sual lang mawi awlsam ber chi a ni hial awm e.

Hetih kawngah hian nang chu i la fihlim a, ka lawmpui top che. I hreh chhan hi a Pathian thu deuh ruih ka beisei a, i hlauh chhan hi sawn thlak hreh vang ngawt ni lovin inpawlna hmanga inkaichhawn theih natna hlauh vang ni satliah mai lovin neih loh palh theih mite nun tihchhiat loh i duh vang ni tel bawk sela, a lawmawm lehzual ang.

Sex hian pumkhatah min siam a, inkungkaihna tha zawk min thlen fo. Mahse, inneih hmaa sex hmang nazawng an innei vek kher lova, inneih hmaa sex hman vanga nula leh tlangval tha lai pawn chhuak ngam lo khawp a bibo an awm phah fo bawk asin. Pa thenkhat chu an faten an u phah a, nu thenkhat pawhin an fate chu an pi te “Nu” tia ko turin a tirlui fo bawk asin. Hetiang harsatna chi hrang hrang lakah hian inneih hmaa inpawl lote nun a hlim zawk a, an hriselna leh thil dang pawhin a that phah zawk chawk bawk.

Mahni tawk a luck ve tak, bialnu pawh nei ve zul siin nula pakhat mah i la ti ve lo chu i thiante tan deu tlak a dawihzepna angin lang mah sela, zei lo leh inpawl hun a tlak hma phah dawn angin hre thawi dawn pawh ni la, an thu zawmin lo hmang ve ngawt lo la, i inchhirna tur i insiam lo zawk ang. Mipa kum 30 leh nula kum 18 pawh innei sela, hmeichhiate hi a tla hnuhnung zawk an ni leh tho tho thin. Hei hi chu sex education huang a ni a, vawi tam kan ziah lan tawhte kha lo chhiarin i hre ve tawh ngei turah ka ngai. Natna a ni lova, zei loh vang a ni lova, tih than loh vang pawh a ni hek lo. Nupa in nih hunah a inkhuangrual tawka sex in hman theih dan in la sawi dun thei alawm. Lo inzir thiam a ngai hran love.

A thinrim apiangin min then

Admin — Sat, 24 Jul 2010 03:26:30 +0000

Nula, km 17 k ni a , hmagai deu my k nei a , a mh ph in k hmagai ce cu a ti ,voi tm sex ph kn hmag dun toh , mhse a thinrm hun 2 ah mn then a , mn hmagai tak2 loh vg em ni ? From +91961588…. thup sak.

Zuk chal ki hreu bum mai hian sihtui a tlan ve thin a. Mahse ni khat chu, chu sihtui tlan ve bawk sakei pachal hian sihtui dang tlan hlen tur khawpin a lo um leng ta dawr dawr mai a. Hlau leh thlabar a tlanchhia ta nafam chu, chu sihtui tlan tur chuan a let leh ngai tawh hauh lo. Sihtui anga ngaiin i bialpa hian a rawn tlan thin che a, um bo tu an awm zet loh chuan a rawn kal leh mai ang. Nang lah a sihhnip chi, tui dul ve tak mai, a zangthal a tluk tawh chuan hreipui hriam fahran lo pawh a keh phel phuk mai awlsam chi i lo ni tawh laklawh bawk si. Uiha, kei chu, i chan tur hi ka dawn lawk ngam lo ka ti.

Hmangaih che e, hmangaih tak che a ni. Mahse, in inhmangiahna hian eng zakhamna thlarau mah a pe lo che u. Hmangaihna hual vel chhunga hlimna chenin hmangaihna chi in kui tiak chauh a ni a, a rah lawh tuma ban uaih uaih chi a la ni lo. Ka sawi hi i hre thiam lo a nih chuan a ruh langin ka han hrilh law law teh ang che. Hmangaihnaah hian inhauh leh intihvui hi a awm fo. Chu chuan inthenna a thlen thei bawk. Nangni chu, a then che a, a then hlen thei lo che a ni a, bakah hmangaihna par zu thlum tui tak i lo hlui hnawk zel bawk si nen, sim a bansan tum ngial mah se a thei mai bik lo a ni ang e. Mipa inchhuang tawh laklawh hi chuan an bialnute thenah an vau chhen ve chawk a nia. A then thei lo che tih i hria a, ani pawhin i hnar thei bik lo tih a hria a, engahnge then tawh lohna thuthlung chham dun tura ropui in rel mai loh le? Tun apanga thupha-chawi reng mai chu, i tihlungawi sen loh hun a thleng reu reu ang e. Kum i tling tawh thova, mipa dang nei turin i virgin tawh bawk si lova, neih ngei tumin i theihtawp chhuah rawh. A duh loh chuan sex hmanpui tawh suh. Hmangaihna hi engkim a ni lo a nia!

Hmangaihna tizualtu tur atan sex dil

Admin — Sat, 24 Jul 2010 03:21:20 +0000

Kum 23 mi k ni a,ka bialpa nen hian khawhmuna awmdun kan ni lo a,mce a hunawl neih chag cuan a rwn xin thn,a rwn jin changa hun thawl deuh kan neih chang pawhin tha deuh in kan in kwm mai thin a,mce tunlai hian nidanga a tawgkam ag lo takin a rawn kal leh hunah cuan sex hmandun twh turin min ti thn a,egvaga cutianga min ti ta mai ge tih ka xoh lahin kan in hmagaihna a xual xel theihna turin a ti thn. Ka bialpa hian mn hmagih tk2 lo m tiaga mn t ta mai hi?no thup sak o.

Sex hman dun hi hmangaihna hmawr bawkna a ni ti ila kan sawi sual a nih vek pawhin kan sawifiah dan a dang deuh tihna a ni mai. A dikna chin a awm hrim hrim. A chhan chu, Pathianin mihringte hi hur hunbi neia ran anga inpawl tura a duan kan ni tlat lova. Chi thlahna chikhat ang leka ngaih mai chi lah a ni lo tih nupa zawng zawng tih theih deuhthaw hian an nemnghet bawk si. Sawi dan dang a sawi fiah talh kan tum a nih rau rau chuan, sex hi inhmangaihna kau peng pawimawh tak pakhat a ni ti ila, kan pawm tlang zawk awm e.

A tira in inkawm dan i tarlan hian in inngaizawng nghet ve hle tih a tilang a. Mahse, mipa tan nula rim hian ‘Nula leh sava thlawk lai chu a vawm tla thei thei a ni mai’ tih thukhawchang kha rilru-ah a riak tlat lo thei lo. Tumahin bialpa neih laiin bialpa dang an neih an ring ngai lo. “Ani tluk a hmangaih ka neih leh theih ka ring lo,” an ti fo. Mahse, hmangaih hmasa ber nei thei chu tlem te chauh kan ni lawi si. Hei hian chiang taka min zirtir chu, pumkhat a insiam a in-ta-chei-theih-na a awm zet loh chuan rei tak nghet taka inngaizawng a inzui fo tawhte pawh an inthen leh fo tih hi a ni. Chu chu in hria emaw in hre lo emaw a lem chuang lo, inngaizawng leh induh tawn mai in nih chhung kha chuan in in-ta-chei-thei dawn chuang lova, sa hel hauh in ti na thei chuang lovang. Chu chuan inthen leh a ti awlsam zual a, pumkhat lo na na na chu, inthunun tur in awm chuang bik hauh lo tih a lantir chiang hle.

I bialpa khan hmangaih lo che sela zawng nupa nun hmanpui che a beisei lovang. Hmeichhia hian an chak mai mawh hle na a, chak mai harsat lo tak mipate tan hian inhriktlak a awlsam zawk fe. Chu chu hmei-chhiate hian an hriat hmaih chawk. Awlsam taka inhritla mai theiin nupa nun hmanpui che a dil a, a duh a, a tum bawk a nih chuan nupui a neih che a hnial lo tihna a kawk tel tih lo hre tawh ang che.

Mahse, inneih hma chuan nupa anga khawsak loh a him ber a. Hmangaihna changchawia sex hmang tawh tam zawkte hi a tawp a inchhir an ni fo. Tin, virgin ngeia pasal i neih chuan nang tlukin i hmangaih kha a hlim dawn a. Hmangaih let ve lo anga i lan dawn ai chuan inneih rawtpui vat zawk la, humsual i dai theihna i pumpelh tihna a ni mai. A hmangaih vang zawk a dil ngam che a ni a, i hmangaih ve chuan i hnial reng thei lovang, inneih vat mai tur.