NLUP avangin chhungkaw sing khat chuan eizawnna ngelnghet an lo nei a nih chuan a lawmawm khawp ang. Mahse, NLUP aia policy tha zawk hmangin chhungkaw sang nga chauh hnenah factory/industry changtlung tak sak ila, mi sing hnih chuang daihin kan hlawkpui ngei ang. Kuhva dawr chu chhungkaw eizawnna chi a ni a. Chhungkaw zinga a tu ber emaw thawh mai theih chi a ni. Hotel leh restaurant changkang takah chuan a tlem berah mi 20 tal thawktu rawih a ngai a. Chutiang bawkin dawr changtlung tak pakhat hian hlawhfa 10 mamawh mah se, industry tenau deuh ringawt pawhin thawktu 50 vel lai a rawih a ngai si a. Chutianga mi tam zawkte tana eizawnna ngelnghet pe thei tur tur industry lam chu kan sawrkar hian din nachang a hria emaw, din thei tura finna leh thiamna neite sum hmanga puih nachang a hriat hma chu chhungkaw tam zawk hi chuan eizawnna ngelnghet kan la nei lo reng zel dawn tihna a ni.

Vanglaini tuktin chhuak hian hlawhfa engzat nge a mamawh i hre lo maithei. News lam buaipuitu te, press a thawk te, advertisement leh clerk lam hna te, paper work leh circulation lam hna te chauh pawhin chhungkaw 50 vel tan eizawnna ngelnghet a siam sak tawh a. Khaw tin leh veng/thler tinah zirlai leh tar chak lo zawkte pawhin eizawnna nei turin hawker/agent hna an thawk bawk a. Vanglaini avang ngawt a chhungkaw eizawnna ngelnghet nei hi mi eng zat nge i chhut thiam tawh em? Chuvangin, industry pawimawh leh changtlung tak tak kan neih teuh hma loh chuan kan ram hian hma a sawn chak thei dawn lo tih hre pha sawrkarna chelh thei kan mamawh a ni. Vawiin thlenga sawrkarna chelhtute hian industry lian leh pawimawh eng zat nge an din tawh? Industry nei tawh sa eng zat nge sum tum sak a an tihchangtlun tawh? Loan takngial pawh kan indil hlawhtlin theih lohna ramah hian NLUP aia policy tha leh tlo zawk tur ngaihtuah chhuah nachang kan hriat thuai loh chuan, kan ram zimte hi suamhmang leh rukru te bupuiah kan chantir thuai dawn tih hria ang u.

(Editorial, July 2010)

Mipui tam zawkte ngaihdan hriat leh an pawmpui ngei a ni tih hriat a nih theih nan public debate te neih nachang kan hre lova. Mahni thuneihna lantir kan tum luat vang emaw, mi chunga leng, mi dang zawngte aia thiam chungchuang leh indah chungnunna avanga mahni thuneihna lantirna tenawm ber chi a ni. Sawrkar kut ke ber bureaucrat-te hi an thiam leh tlin vanga hetiang hna sang leh zahawm chelh thei hi an ni a. Chu ringawt chuan tisual thei lo hulhual an ni tih a tinzawn chuang hauh lo tih an inhre thin lo a ni.

Sawrkar hmalak tawhna tam tak leh an hmachhawp mek thenkhatte chu mipui nawlpui lo inrawlh ve ngawtna chi ni hauh lo te, mipui tam zawk nun khawih nghal chi ni lem lote pawh an ni nual ta ve ang. Mahse, kawlphetha siamna tur tuikhuah, chhiah chi hrang hrang lakna leh mipui mimir nun khawih nghal thil angah te hi chuan kan sawrkar hian zau zawka mipui/mifingte rawn nachang a hriat thuai loh chuan buai leh harsatna an la hmachhawn zel fovang.

A bik takin chhiah lak dan chi hrang hrangte hi sawrkarin a kalpui mai pawh a, a enkawl zui mumal leh thei si lo tih mipuiten an hriat tawh avangin huaisen takin an dodal ngam tawh a ni. VAT lak dan dik fumfe lo te, roadside parking fee leh chhiah thenkhat hi chu mipuite zawh loh nghawngkawl bahtirna a ni tih an han hriat chhuah meuh chuan bureaucrat ho hian an pu (concern minister) te an bel leh ruai a. Anni minister ho pawhin an bureaucrat ho an ko khu ruai zel a. Thu zak leh hnihne tura arkhawthimdai fo tawh lovin kan sawrkar hian kalphung tha leh dik, tlo leh zahawm a neih theih tikah buaina tam tak chu kan la pumpelh chhawm chauh dawn tih hre hlawm teh se. Chutianga fing taka rorel a nih theih nan chuan mipui tam zawkte remtihpuina la tura sawihona zau zawk neih fo hi kan hreh tur a ni ngai lovang.

(Editorial, June 2010)

Planned Fund chu sawrkar hnathawkte hlawh, sawrkar inrelbawlna tur leh department kaltlanga ram hmasawnna tur hna pawimawh tak tak thawhna turte an nih hlawm avangin ram mipui nawlpui pawhin kan ngaihven hle reng zel a. Sawrkar hnathawkte hlawh la thei lo, la hman lo, hlawh la tlai tih thawm kan hriat tur a awm miah loh laia hmanna tur ruahman lawk diam tawh sum khati zozai hman lohva a awm ta mai khan mipui a barakhaih lo thei lo.

Planned Fund ‘lapse’ ta kha cheng vaibelchhe 70 chuang a ni a. Cheng vbc 70 chuang nikum Financial Year chhung khan kan hloh tihna a nih kher lo. Mahse, nikum chhung khan department hrang hrang kaltlanga sum hman theih lohva a awm teuh avang khan Mizoram hmasawnna tur hna tam tak chu thawh a ni ta lo tih erawh a chiang hle.

Khang sum ‘lapse’ ta te kha NLUP anga chhungkaw bil tute emaw dawn tur a nih loh avang ngawtin kan ngaihthah thiang chuang lo. Rural Development department atanga hman tur Rs. 21,50,06,988/- hman lohva awm ta avang khan thingtlang hmasawnna hna tam tak a thuanawp a. Social Welfare department  atanga hman tur Rs. 9,93,67,466/- avang khan hnuchham chawmna leh rualbanlo  enkawlna hmunte chuan chaw an nghei phah hial thei asin. Urban Development & Poverty Allevation deptt. atanga hman tur Rs. 8,89,58,364/- hman si lohva a awm avang khan khawpui chhung tihhmasawnna tur hna tam tak a thuanthu a, Industries department atanga hman tur Rs. 1,04,01,255/- hman theih si loh avang khan small sclae industry kan neih tlemte te hian hma an sawn loh phah thei a, industry thar a pian belh loh phah thei hial bawk asin.

A hmanna tur leh a hmangtu tur chu eng pawh ni rawh se, budget pawm a nih tawh rau rau chuan ram hmasawnna tura sum bitukte hi chuang bang awm hauh lova hman tan nghal nise tih hi mipuite beisei a ni a. Hmasawnna tur kawng tam tak a awm a, tihhmasawnna tur atana senso tur sum pawh a awm lawk diam tawh laia cheng vbc 70 chuang hman lohva a awm kha sawrkarna chelhtu minister te leh sawrkar hnathawk liante mawh liau liau a ni chiang khawp. Mipuite chhawr tangkai theih tur ram hmasawnna hna pakhat chauh pawh thawh lohva a awm dawn ai chuan State Assembly-in Appropriation Bill a pass leh hma zawng chu in hlawh kha la lo ngam ve teh u.

Planned Fund ‘lapse’ ta kha state sawrkar tan hman theih lohvin a luang ral lo tih vang ngawtin in hmai phihfai tum suh u. Kum kalta (2009-2010) zawng khan cheng vbc 70 chuang hu hmasawnna kan hloh hi mipuite hian channa nasa takah kan ngai lo thei lo. In inthlahdah vang a ni a, a mawh in phur a, in thiam loh liau liau a ni tih inhre hlawm teh u.

(Editorial, May 2010)

Mamit khawpui a neih zawh tak Kristian Thalai Pawl (KTP) khawmpui lian vawi 53-naa report tarlan danin kohhran thalai pawl a inhmang tak takte zinga 38.5% chauhvin Biakin hawnga nupui/pasal an neih laiin a tam zawk 61.5% zetin kohhran dan ang lova nupui/pasal an nei hi thil mak a ni hran lo. KTP report leh SFF survey report-te hian inzawmna an nei lova, Biakin hawng lova innei tih vang ngawtin chutiang mite chu inneih hmaa sex hman vangah kan ngaih sak ngawt thei vek hek lovang. Kohhran thuhmun loh vang te, chhungte inbiak thiam loh vang te, chan mai hlauhna te leh chhan dang chi hrang hrang vangin kohhran dan zawm thlapa Biakin hawng khera inneih hi mi tam tak tan chuan a theih loh ve fo thin tih kan hriat ve a tul.

ZawlaiDi chhiar thangte chuan thurawn hmanga chhiartuten virginity chungchanga zawhna an neihte leh thurawn an rawn beisei atang te a chhatin Mizote zingah hian virginity hian ngaihhlut a la hlawh reng a, a hlu zual tulh tulh zawk dawn pawh niin a lang thei, tih kan hre awm e. Hmanlai kan pi le pute hunlai ang lo takin tunlai Mizo thalaite leh nula/tlangvalte hian virginity hi, a hmei a pa-in, a hlu a ni tih kan hre chiang tulh tulh a. Mipa tam takte pawhin an ngaihzawngte remtihna tel lova sex hmanpui an tum loh thute, hmeichhiate pawhin sex hmanpui loh reng a harsatzia an hriat chian vanga inneih an rawt mai zel tawh thute pawh kan hre awm e. Mizote zingah hian inneih hmaa sex hman hi hluar chho ve zel mah se, nupa tan chauhva siam inpawlna hi inneih hma chuan lo tih ve ngawt chi a ni hauh lo, tih leh, virginity hi hmeichhiate tluk zet bawkin mipa tan a hlu a ni tih hi kan inzirtir tam lehzual a la ngai zel dawn tho niin a lang. Tuna kan dinhmun aia chhe zawk a kan inbarh luh mai loh nan mitinin theihtawp kan chhuah reng tur a ni.

(Editorial, April 2010)

Kohhran chuan finfiahna awm loh chhuanalmin leh an kuang lo nawr chan chang tura an indah avangin hlemhletna avanga mualpho leh suspend mekte pawh a tha en liam vel mai mai a. Hetiang mite hi khawtlang thiltihnaah leh chhiat ni/that ni ahte pawh kawmserh leh tuithlar an ni hlawm bawk si lo nen, rorelna khawl lamin thiam loh a chantir hma chu engkimah tualkhatin kan la leng za dial dial zel rih a. Hei hian kan khawtlang nunah hlemhletna a tuh nghet tih kan pawm duh loh leh pawm ngam loh vang a ni tih a tilang reng.

Hlemhletna leh eirukna te, induhsakna hleihluak te hi nuai bova rinawm leh dik taka kan ramin ke a pen theih nan chuan thinlung a tuh nghet bertu kan sakhua hian tun aia nasa zawka a kalpui a ngai a. Tin, YMA kumpuan “Khawtlang nun siamthat” hian fet eltianga a kalpui tel a ngai bawk ang. Kohhran leh khawtlang (YMA)-in theihtawp chhuaha sawrkar a han kar ngar ngar tawh hi chuan zu khapna dan pawh siam a ni mai a. Hlip tawh tura nawrna awm zawng zawng pawh haider lui turin vawiin thlengin a la siam ta reng mai a nih hi. Hetiang tluk zet bawk hian kohhran inthlan leh khawtlang (YMA) thiltihna leh inthlan velahte reng reng pawh mahni hlawh leh thawh chhuah phu lova hausa leh awmthei te chu thlang tling lo ngam ila. Politics-ah lek phei chuan thawh chhuah leh hlawhtlinna mumal tak hmuh leh hriat tur awm si lova hausa thut leh hausa hluai te hi hmun kian lo ngam ila zawng, kan khawtlang nun hi a va tha chak lehzual dawn em.

Zu leh ruihhlo kan hua a kan do ngam tluk zet bawkin hlemhletna hi haw ngamin do ngam ila chuan YMA hian a kumpuan tihhlawhtlinna kawngah a hlawhtling lehzual zawk ngeiin ka ring. Zu leh ruihhlo zuar pachhe tak tak vai vai ngawt lo hian mi lian leh thiltithei zawkte hi vil uluk zawk ila NLUP leh sawrkar hmalakna chi hrang hrang PMEGP leh thil dangte pawh hian Zofate hmasawn nan hna a thawk tha lehzual ngeiin a rinawm.

(Editorial, March 2010)

Hmanni lawk khan Dawr a “Zoramthanga i nei em?” tia lei tur an zawh khan dawr kaite chuan Mombati an pe nghal mai thin a. Kum a vei awrh chauhva, “Lal Thanhawla i nei em?” an tih hian Mombati bawk dawr kaiten an hralh leh chur chur tawh tihte an hre ve lo em ni? Solar Lamp, Inverter leh VIP Light chhi pha lo hi miretheite mai an ni lo. Sawrkar mi pawimawh tak tak, mi In luah a khawsa sumdawng thawhhlawk zet zet, ram hmasawnna atana a kil a lung tangkai ber berte pawh Zoramthanga leh Lal Thanhawla an kat nuk tawh tih hi kan ram hruaitute an hre ve lo a nih ngai chuan hrilh bengvartu pawh nei lo khawp hruaitu khawhawi zim tak an ni tihna a ni ang a, thlan tlin nawn leh tlak pawh an ni lo tih hi mipuite ngaihdan a ni.

Ram hruaitu kan neihte zinga kum lama upa filawr lak Brig. Thenphunga Sailo hian vawi duai lo sawiin Power lama kan ram intodelh theihna tura ruahmanna an lo neih tawhte leh an lo kalpui thui-pui-viau chungchang hi thahnemngai takin a tlangaupui fova. Sawrkarna an chelh nawn leh theih theih tak loh vang a tihpuitlin loh kha ni awm takin a sawi a. A hnu a sawrkarna changtu, a bik takin Zoramthanga kaihhruai MNF leh Lal Thanhawla kaihhruai MPCC te hian kum 20 hnu pawh a tihpuitlin ngaihna an hre lo a nih chuan a ngaihna hria rawn leh tihtir nachang hria sela, mifing tih fo thin dana a tithei zawkte tihtira a rah sengtu nih zawk hlauh mai hi politics thilah pawh lungte pakhat a sava pahnih vawm tlak tluk zetin a hlawk zawk ngei ang.

Inpuhmawh tawn ringawt lovin, compensation ringawt buaipui lovin sawrkar hian ram hmasawnna thlen tak tak tur tihpuitlin nan hian a thiltihtheihna hi khauh zawkin kalpui sela. Tunah rel leh dem hlawh mah se, khuarei ngaihtuah chuan an political career atan sul a su thui zawkin a rinawm a. Anmahni leh an political party tan kori a tu zawk ang a, hamthatna dawn tur an la neih rei phah zawk ang.

(Editorial, February 2010)

Rorelna pakhat hnuaia Zofate ralmuanna leh himna tur sawia relna tur hmunpui atana thlan nahawm ber Mizoram ngei maia hetiang hmun pawimawh din a lo ni ta hi a lawmawm viau rualin chu hmunah ngei mai chuan hnam kawhmawhbawl thenkhat avangin Zo hnahthlakte  chu thlabarin kan awm reng fo mai erawh hi chu ngaihthiam a har khawp mai. Vanduai fal bik chu awm ngai alawm. Mahse, politics thila hamthatna duh vanga pawisawi lo nunna la tura ralpui phiar a inphiar a, ran ang maia phil kan ni hi, mahni ram chhung ngeia thilthleng atan chuan a vanduaithlak chungchuang bik a, palzam a ngaia neih mai theih a ni ngai lovang.

Buaina pakhat atanga buaina dang kangkaiin Tuikuk khaw eng emaw zat chu chenna tlak lohvah a siam a. Kiltin atangin tanpuina pawh a lut chawpchilh nghal ruih ruih a. Tuikuk tlan darh leh kawhmawhbawl thenkhat avanga thlabar reng renga awm Mizoram chhung leh Tripura ram lama Zo hnahthlakte thlavang hauhtu kan awm loh bakah buaina siper tuar Mizo khaw eng emaw zatte tana chhawmdawlna leh vehbur khawn a tanpui chungchanga kan thawkmawh leh viau lawi si hi chu a Mizo zia lo hle.

Bible min zirtir angin mahni inhmangaih thiam phawt ila, mi dangte chu kan la hmangaih thiam chhawm ve mai tur alawm. Mahni leh kan chipuite chunga hmangaihna lantir thei si lovin raltlan leh hnam dangte tanpui a chhawmdawl kawnga kan tha a za sek mai hi a dik lo phei zawng a ni hauh lo nachungin a kalh a kim zan lo deuh tlat a ni. Zofa thlabarte thlamuanin tanpui an ngaihna kawngah chhawmdawl hmasa zet ila, chumi hnuah kan chhehvel amite chhawmdawlin kan tanpui zawk tur a ni ang. Zo Inpui kan sakna Mizoram sawrkar leh a chhunga cheng mipui mimir hrim hrimte pawh hian state dang huam chhunga awm Zo hnahthlakte chen bitna hmun bik leh hmanlai ata tawha kan ram ang maia kan cheibawl khuate hi chu an thlavang hauh kawngah te, chhawmdawlna kawngah leh tanpui an ngaihna kawng hrang hrangah mit naute tlukin kan ngai pawimawh reng tur a ni.

(Editorial, January 2010)