ZawlaiDi » Admin

test skin & Beauty

Admin — Mon, 26 Jul 2010 17:24:16 +0000

Chantawk khuarel a rawng lua e

Admin — Sun, 25 Jul 2010 05:36:23 +0000

By P.C. Laldinliani

Chhawrthlapui eng mawi tak, chhum dum chhah pui puiin a hliah thim ruai ruai ang mai hi a ni ka hringnun chu! Hlimna leh lawmlai niten mual min liamsan a, lungngaihna leh mang-anna chhumpui chuan min bawm ta zawk si! Chu Phengphehlep tial mawi tak chuan kumkhua, chatuan atan min thlawhbosan dawn ta a ni. Hlimna tam tak min siamsak a. Vawi tam tak ka tahna thlen thintu khan pangpar mawi zawk bawm tumin min kalsan hlen dawn ta a nih chu! Amaha ka beiseina sang tak leh ka lo innghah vena lungphum zawng zawngte chu chim vekin, Chhimbal mawi taka zamral ta ang maiin a lo ral ve dawn ta a ni!

Aw…Phengphehlep chi-mawm! Aw..Phengphehlep duhawm..huat-thlala, theihnghilh theih tur si loh maw i lo nih le? Pangpar pakhata lungawi lova, par zu tam tak tlan kual a, thlawhbosan leh ching mi i ni thin reng lo em ni? Parmawina zawng zawng a tlan zawh hnu, thlumna reng reng nei tawh lote zinga pakhat chu ka lo ni ve ta si! Thuphachawina leh ngaihdam dilna mai hian ka thinlung hliam chu a thawidam zo ta lo! Engtik hunah emaw chuan, amah vanga ka lungngaihna leh thinlung natna zawng zawng chuan mual min liamsan ang a, ka ngai leh tawh ngai lovang!!

Chu zan boruak thiang tak hnuaiah chuan a hmel chu naupang pawisawilo ang maia thianglim leh duhawm a ni. Ri mang lova a nui ri te chuan chhungrilah min la tham a. Vawi tam tak ka thinlung a hliam tawh chung pawha ka la hmangaih cheu chu tudang ni lovin AMAH ngei hi a ni si!!

“Nizanah ka mumangah ka lo hmu che a,” zawi thawp satin a rawn tichhuak a.

“Engtinnge min lo hmuh a?”

“Ka mumangah lehzel pawh i hnenah ngaihdam ka lo dil che a. Chuvangin, i mi ngaihdam ka ngai a ni.” A awka chu a dam raihin a runthlak kher mai! Pathian leh!! Ka ngaih-dam ngaiin a inhre ve a nih chu!! Ka thinlung a tuiral vek thei hial awm e. Mahse, vawi sang tam tak pawh ngaihdam min dil mahse, a man zo dawn em ni? Ka tuarna hrehawm leh rapthlak tak kha, khawvel eng tawngkam thiamna mah hian a man zo mawlh lo!!

“Ngaihdamna tur engmah a awm hleinem! Mipain ngaihdam ngaiin thil an ti ngai lo. I duhthlanna ngei i hmang a lawm,” tiin ka chhang a. mahse, ka thinlung erawh a tap a ni. Engvanga ngaidam theilo nge maw ka nih reng le? A lakah ka phut sang lutuk em ni zawk? Ni lo..nilo..Thildang a tihsual chu a siamthat leh theih pawh a ni mahna. Mahse, he a thiltih sual erawh hi chu engtikahmah kan siamtha ngai tawh lovang. Chelhdin ruallohvin hun chuan a liampui a. Hriatrengna chu engtinmah a nawhreh theih tawh si loh!!

Hun a ral a, ni a liam a. April 15 zan a lo inherchhuak ta. He zan hi ka tana theihnghilh theih loh tur, zan chhinchhiahtlak, duhawmlo tak a ni. Ka hmangaih ber nen chatuan atana inthen hlen tawh tura ‘Thu’ kan thlun zan a lo ni ta! Chu Chhawr-thlapui eng ruih mai chu kan inkar thuthlung min hriatpuitu a ni a. A tukzing nichuak eng mawi tak chuan sut leh theih tawh loh turin a rawn nemnghet ta si!!

Ka hlimna leh ka thinlung zawng zawng nei thintu, englai maha ka theihnghilh loh tur chu thla eng ruih hnuaiah chuan muang takin a let chhat chhat a. A ke pen ri chu mitthi dar ri ang maia ngaihnawm loh a ni. A inhmeh fo thin a thawmhnaw hak nen chuan mitthla-ah a cham reng dawn a ni. Ka thinlung natna leh tuarna chu a intan dawn chauh tih ka hria a. Engtinnge maw ka tuarchhuah tak ang le? “Nanglo chu tumah duh tak tak ka nei lo. I tello chuan nuam ka ti tak tak lo..” titu ngei chu. Ka chhia leh tha hriatna Court-in a nundan chu diklo tia thiam loha chantirin, thil tha ber nia ka hriat angin, kumkhua atan ka lo mangtha ta a ni.

Tunah zet zawng ka duhthlanna ngeiin mi chanve ang lek ka lo ni ta! Taksa him pial si in, thinlung chhungril erawh chuan tihdam theih loh natna a pai a. A hmangaihna thlazar hnuaiah thlamuang taka ka awmlai nite kha…dawn titam…tah-khua tiseitu mai a lo chang zo ta!! A tel lova hringnun hman khawharthlak zia hi tuin nge sawifiah thei ang le?

A tawng dan te, a nuih dan te, kan inhriattirh lai vela kan awmdan zawng zawngte, an Ina min kalpui hmasak ber tum te, ka hminga min koh hmasak ber ni te, a mitmeng tawrhhar runthlak taka min en lai te, a hriat hauh lohva atana mittui tla zawih zawiha ka tawngtai thin laite leh atthlak taka ka thinur changa min dawhtheih lai hun zawng zawngte kha. A engkim mai chu ka mitthla-in a la hmu thei vek mai! Namen lovin ka thinlung chu a leng ta vawng vawng a, engtinnge ka tih tak ang? He khawharna leh lungngaihna ata hi tunge min chhhanchhuak ta ang le? Ka hringnun parvul vanglai tak chu, a zunah ngetin a lo chuai zo ta si! Enkawla, chawm nung theitu awm tak ang maw?

Suangtuahna mitthla mai zawng a tawk si lo!! Kan hlimthla-a suihlung ka ruallai ni zawng zawngte chu ka han en a. A ngaitein kan la lang a, ngaihnobei takin a lo meng si sap a. Ka en a, ka en reng a. Ka thinlung khawharna chu a hnem zo tak tak si lo. Ka nun ram chu thlaler ang maia ruak a ni.

Hun leh ni inher vel chuan hlimna ni a rawn herchhuah pui ta! Thlifim thaw heuh heuh chuan hruizam leh thinghnah nem te chu a chhem kur siau siau a. Luikam tiauvut leh lung khawkrawk, lui tui luangri dem dem a Sangha te takte te lengkawi zek zek te chuan min tidam sawng sawng mai. Ka thinlung na zawng zawng min upbeh sak a. Hlim takin min lentir a, ka thinlunga lawmna pangpar chuai mek pawh a rawn tivul leh ta. Mahse, tlaikhua a lo ngui a, zan a lo thleng a. Ka hlimna chuan rei a daih leh si lo!! Aw..engatinge Khuannu pawh hian hetiang em a vanduai tura min lo duan? A tello chuan damzo dawnin ka inhre mawlh lo. Ka thinlung chhungril chu khawharna in a zem tlat a. Englaimahin ka theihnghilh thei silo.

Thenrualte chu hlim takin Di nen an leng a. Sawtna awm hauh lovin ka thin a lo ur a. Chhawrthlapui eng mawi tak pawhin ka tan awmzia reng a nei pha ta lo. Tunhma kha chuan khawvel hian ka tan mawina tinreng a chhuah a. Mi zawng zawng an hlim a. Mahse, tunah zawng beisei tur leh damchhan reng a awm tawh lo. Hlimna chuan hnutiang min chhawn a. Khawvel parmawi chu ka tan lak bova awmin, a hling chauh chu ka chantawk a lo ni ta! Ka tawrh ang tuar, hringfa leng zingah awm tak ang maw? Engkim mai chuan AMAH min hriatchhuah tir a. A… heti ringawt zawng a ni thei love. Ka nunkhua chu amah leh midang nena khaikhin reng rengin ka hmang kumkhua dawn em ni? Kan inhmangaihnna mawi tak kha, zing tiauchhum leh daifim ang maiin a lo ral zo ta a.Enga tinge sam ang then zai kan lo rel tak mai chu le?

Hmangaih lungdi tawng thin mah ila, kei atan zawng tahna leh lungngaihna mai a chang leh thin. Nun hian awmzia a nei tawh lova. Ka suangtuah phak ngai loh, khawvela mi hlauhawm ber, mi beidawngte dinhmunah ka lo ding ve ta reng mai!! Tunah zet zawng, CHANTAWK KHAUREL A RAWNG LUA A NI, ti chung zelin ka damchhung hun ka hmang dawn ta a ni.

(Published on January 2010)

Colombia-in thenawm ramte nen inlaichinna chhu chat

Admin — Sun, 25 Jul 2010 05:11:37 +0000

Venezuela President, Hugo Chavez-a’n an ram thenawm, Colombia ram nena an inlaichinna a chhu chat. Colombia sawrkarin an ram tichhe tura hel-te tawm khawmna nia Colombia a puh avangin he thutlukna hi a siam lo thei lo niin Hugo Chavez chuan a sawi a, an rama Colombia sawrkar hnuaia thawk zawng zawngte chu Pathianni hma ngeia an ram chhuahsan tura hriattirin, an ram sipaite pawh Colombia nena an inrina laiah inring renga awm turin a hriattir bawk. Venezuela Foreign Minister, Nicolas Maduro pawhin, Colombia nena an insumdawn tawnna zawng zawng pawh tihtawp nghal a ni tih a sawi a, hemi bakah hian Venezuela ram atanga an rama thlawhna thlawh luh pawh an khap nghal tih a sawi bawk. Washington khawpuia Organisation of American States (OAS) aiawhte inhmuh khawmnaah, Colombia ram aiawhte chuan an rama hel pawl pahnih, Marxist Farc leh ELN-te chu Venezuela-ah an awm ngei tih infiahna nia an sawi, Video thahnem tak an pho chhuak a, hetianga hel ho hum zawnga thil ti-a puh an nih avang hian Venezuela President, Hugo Chavez chu a thinrim hle a, OAS member ram kal khawmte hmaa Colombia aiawhte Video pho chhuah chu a lem nia sawiin, an ram sawrkar chuan Colombia hel pawlten ramri kana an ram an luh loh nan theihtawp a chhuah zawk niin a sawi a, dik lo taka puhtu, Colombia ram nena an inlaichinna zawng zawng chhut chah chu thil tih loh theih loh niin a sawi. North Korea-in an thenawm, South Korea leh US sipaiten tuipuia nunchan an zir hona tur chu a duh loh em avangin sipai chakna hmanga an thil tih thulhtir mai pawh a hnial lo niin a sawi. He thu hi Vietnam-a South East Asia ram Foreign Minister kal khawmte hmaah North Korea palai, Ri Tong-il chuan a sawi a, US leh South Korea sipaite thil tih tum chu Korea ram pahnih inrina tuipui hrula khawsa-te mai bakah Asia ram pumpui tana thil pawi thei niin a sawi a, he thil hi an duh loh em avangin, an ram chuan US sipaite chu an thil tih tum a hlawhtlin loh nana sipai chakna hmanga beih mai pawh a hnial lo niin a sawi. Puan tawh angin, tun hnaia South Korea leh North Korea ramri tlawhtu, US Secretary of State Hillary Clinton chuan, kumin March thlaa South Korea indo lawng kap piltu-a an puh, North Korea chu US-in a hrek belh chhah tur thu a sawi a, hei mai bakah hian an ram sipaiten North Korea nena inhal tak, South Korea sipaite nunchan an zirpui dawn avangin, US lakah hian North Korea hi a lungawi lo thar hle a ni.

June 2010 Cover Image

Admin — Sat, 24 Jul 2010 05:05:19 +0000

Lawmzuali Khiangte hian nasa zawka zai lama inhman a tum mek na in, intihsiakna Idol? Icon ang chiah chuan tel tumna a nei tawh lem lova. Tin, Cassette siam pawh a rilruk lutuk lem lo bawk. Chutihlai chuan Music video erawh a theih ang ang a siam chho reng a tum thung. Amah a la naupanga hun tha tam tak a la nei bawk a, he nula hmeltha, pian nalh leh zaithiam ni bawk hian mizote mit leh beng hi a la titlai dawn chauh turah ngai ila, beiseina nen hla hmanga ruai ropui min thehsak tur chu dawhthei takin i lo thlir phawt mai teh ang u…… Read her story by clicking this link.

NUNHLUI CHULHNU

Admin — Sat, 24 Jul 2010 04:03:32 +0000

By Henry MS Dawnga
Lungleng mi han nih meuh chuh!! Hringnun ngaihtuahna a vak thuiin ava han hawl kim thin teh reng em! Mahni eng nilo mah ila, hringnun chan chhunga rilru a awm ve reng tur chu han au chhuahpui chakna ka nei ve tlat mai a, min nawrtu a nasat luatah mi pawi ka sawi leh sawi loh lam pawh ka dawn zo tawh hek lo. Lungmuang takin rilru chhungril pik tak chu ka han sawrchhuak ve rawi mai teh ang.

Leilung chhul chhuak hringfa te zingah hian mi vanduai tak tak an tam hle awm e. Mahni pianken ah emaw, tawhsual tawh palh vanga rualbanlo a rawn chawr chhuak ta lah an tam hle. Chung mi khawngaihthlakawm tak tak te ang em chuan vanduai ve lo mah ila, kei mi pangngai dinhmuna ding ve ta chu vanduai ka inti ve tlat mai. Khuanu in ka tan a ruat vanduaina chu thil dang vak a ni hran lo, mi tam tak te’n an lo tawn tawh, an tawn mek leh an tawn zel tur, hringmi leng te rilru na leh khawhar ngawih ngawiha siam thin tu a ni ti ila kan sawi sual kher awm lo e.

Pathian atanga chhuak hmangaihna dik tak ka hriat thiam hma, mawina ringawt zawnga Khawvel ka chen lai khan Nupui ka nei ve a. Kum khat awrh chauh kan innei hman, engvang tehreng nge maw ni? Kan nu nen chuan kan in phatsan leh ta tlat mai. Chuta tang chuan Pathlawi tih dinhmun duhawmlo tak chu ka lo chang ve ta. Mahse, kei chuan Pathlawi nih chu engah teh vak ka la urhsun lem lo. Chutah hun leh ni te alo inher liam zel a, tlangval hnahkhat erawh ni tawh lo mah ila tlangval ang maia ka len leh hnu chuan hmangaihna dik takin nula pakhat ka hmangaih ve ta tlat mai. Ka hriatsual loh phei chuan a ni pawhin min hmangaih ve hle niin ka hria. Ka hmangaih tak nena hringnun hlim taka kan hman dun lai mek chuan, karah harsatna alo thleng ta. Ka chanchin duhawmlo tak hrilh ka tum reng thin, ka hrilh hreh em em Pathlawi ka ni tih chu mi tawngka atangin a lo hre ta. Min hmangaih ve em em tu ni a ka hriat chuan damchhung reilo te atan lungngaihna tizual turin thenna biahthu min hlan leh ta mai chu, tuar thiam a va har ngai em! Hringnun khawvel hi ka tan zawng damlai pialral a chang zo ta. Ka nun hlimna ber, a anka nem leh sakhmel tawng lo a hun leh ni ka hmang mai tur chu ka dawn ngam mawlh lo. Ngaihtuah ava tam em! Tihtheih lah a awm der si lo. Chutia khawhar tak leh lungleng em em a ka awmlai chuan ka suangtuahna chuan a hawl kim hle mai. Chuta tang chuan he hla thu hi ka thinlungah alo piang chhuak ta :-

Tawrh thiam a har ngei ka tan,

Khuanu ruat loh di tawn chu;

Tah khua tisei tu mai lo ni e.

Tunah zawng maw duhlai Di enchim loh,

Tha leng dang tawn ah biahthu i hlan ta maw;

I lungdum ngei tangah chuan va bei la,

Hlimten leng nang che tuahrem loh di

Nunhlui mual liam tawh hnu zawng te kha,

Ngai in ka au vawng vawng thin asin;

Mahse famkhawpuitual a len hun chuan,

Hlim ten nang tawn leh ka nuam ngei e.

Mi te zawng an kawp lai di nen hlim taka an len laiin, kei ni zawng a thiang te’n hlim takin kan leng dun thei tawh lo. Mahni chauh a awm a, kan NUNHLUI CHULHNU ngaihtuah ngawt mai loh chu engmah tih theih dang a awm tawh lo. Leilung mawina a famkim lo a, nun lah thla a muang thei tawh hek lo. Mahse, ka dem lo a, ka dem theih ani hek lo. Hringnun mawina phena, ropuina awm chu ka ngaisang a ka chhuang bawk a ni. Hmeichhia a zawnga nunnem leh zaidam, hawihhawm tak mai hian tha a tih leh a duh ang chu a kal tlangpui thei a, a thutiam ah a rinawm a, a thutiam bawhchhiat ai chuan a hmangaih ve em em chu chan a huam a ni. Hetiang khawpa hmeichhe fel leh rinawm hi sawisel tur thlawt ka hre lo a ni ber e. Hei avang hian alawm a lakah ka luangliam a, thamral lo zun ka lo phurh tak ni! Ka hmangaih leh duh em em in thennan biahthu min hlan a, val dang tawnah min liam san tawh mah se, ka hmangaihna hian chuai ni reng a nei dawn lo.

Kan intawn tirh te ka dawn kir thin. Min hmangaih a min duh a ni tih a rawn sawi chhuahna aw mawi tak mai chuan, ka tan thu ngaihthlak hrehawm tak leh lungngaihna min thlen tu a rawn sawi chhuak leh ta si! Hlimna chu khawharna leh lungngaihna in a rawn thlak a, hmangaih biahthu kan hlan te chu a tham ral zo ta. Ka hringnun chuan hmangaihna avangin hliam a tuar a, he ka hliam tuar hian zia awm aiin zual lam a pan zel chu anih hi maw. Ka nun khawhar tak chuan hnemtu a ngai a, a hmu zo silo. Ka hlim leh lawmna te’n zamual min liam san a, lungngaihna leh khawharna te chuan he ka hringnunah hian awmhmun an khuar chu a nih der tak hi!

He hringnun hmangaihna avanga ka nunin vanduaina a tawh atang hi chuan thenrual kawm pawh hi nuam ka ti tak tak thei lova, tuma tih buai phak loha awm hi ka thlang ber fo thin, mahni chauha awm a kan nunhlui ngaihtuah hi chuan he thu hi ka ngaihtuah chhuak thin “Aw duhlai, i hmangaihna thianghlim tak, engmah in ala tih bawlhhlawh loh min hlan lai te kha ka chhingmitthla ah hian a cham reng thin, theihnghilh che a hnek in kan hun liam ta te kha nimin lawk a kan hun hman ang mai in ka thinlungah hian a la thar reng thin asin. He khawvel mawina tizual tura lo awm, pangpar chi hrang hrang te pawh hian anmahni chawm tura tui an mawmawh ang bawk in ka nun hian chawmtu a mamawh ngawih ngawih a ni.

Hla phuahtu in “Hmangaihna kawng hi alo va mak ngai em, a riang nun tivul a tichuai mai an maw” tiin alo phuah chhuak a. A dik zia chu keimah ah hian a lo lang chhuak ta. Hmangaihna hian he ka hringnun hi a vullai a rawn thliak a, a chuai zo ta a ni. Heti khawp hian keinin rilru nat nan lo hmang mah ila, Pathianin mihringte inkara hmangaihna a lo dah hi chu a ropui ka ti thin. A hmang dik tu leh hmangthiam te tan chuan nun hlimna, hringnun tivul tu erawh ava ni chiang tehlul em! Hmangaihna hi leilung tawng chauh pawh nilo, van mite tawng pawh a, tawngkam leh thumal mawi ber a ni hial awm e. Hmangaihna hi a ropuizia leh a pawimawhzia hi hringfa te ka in a puang chhuak zo lo a. Khawvel sum tinreng hian a lei zo bawk hek lo. Hmangaihna chu ama ze pui hmangaihna chauh lo chuan a lei zo si lo. Hmangaihna chu a uang ngai lo a, a thik thu erawh a chhe hle thung, amahah chuan ropuina zawng zawng hi a kim vek a ni. Hmangaihna hian hringnunah hian hmun pawimawh tak ava chang tehlul em!

A tawp ber atan chuan, ka hmangaih leh duh em em chu ti hian biahthu kan hlan leh lawk teh ang:-

“Tinkim dawnin hmatiang hun thlir ila,
Fam zun ngaih iangin thinlai a zing;
Engan kher nge khuanu ruat loh di,
Nang kher ka lo tawn che Parmawi;
Kumsul lo veiin lengdang tawnah,
Min liamsan tawh mahla e;
Ka hmangaihna che hi ka hril zel ang,
Nang ang lungdum tu tawng leh hian ka mawi si lo.”

(Published on January 2010)

Mahni fa hmasa hmangaih harsat

Admin — Sat, 24 Jul 2010 03:35:31 +0000

Kum 18 ka nih in pongsual vang in nau ka paia tuhnen ah mah ka soingam bok si lo. Tun ah cun pasal tha deuh nei in fa 3 kan nei toha tuna ka fate angin ka fa hmasa ka hmangaìh thei lo, ka in ngaihtuah in ka in thiam lo bok si advice min pe teh apa ang ropui si ka enkawl angai sia

Mahni ril a rah fa i hring a, pawngsual vanga fa pai chuan titla duh pawh nila mi zawng zawngin thiam an chan em em tur che a nih laia titla duh lova neiin tunah ka hmangaih thei lo i ti maw? Tih ngaihna ka hre lo, ka pi, ka nu i ni ang tih ka hlau khawp mai. Engahnge pawngsual vanga fa i pai le? Tihtlak theih a ni tih i hai bik awm der si lo. I thiam loh vek a ni a, ka pi, i fa lakah chuan hmangaih i ba tih inhre thar leh teh. Nangmah avanga khaw eng hmu ve a ni a, a puitlin hma chu tuna i pasal laka i fate tluk chiah bawk khan i lak atang leh midang lak atang pawhin hmangaihna a dawng ve tur a ni. Chu chu a dikna chanvo (rights) a ni. Tuna i pasal kha i la hrilh lova, a naute pawhin an la hre lo a nih pawhin huaisen takin hmachhawn la, hrilh la, sawi ho teh u. I phatsan ngat chuan a sawhkhawk tuar turin i rlru inpeih fel lawk sa mai teh. Mi dangte aia tuar hmasa tu chu chhungkhat laina hnaivai an ni a. Nu leh pate hian an tuar hmasa ber fo bawk. I thei ngang lo a nih chuan hnuchham chawmnaah i dah dawn nia.

Thanthi neih hmain rai theih em?

Admin — Sat, 24 Jul 2010 03:34:54 +0000

Thanthi neih hmaa mipa in an pwlin fa annei thei lo antih hi tak2 ani m?no.thupsak teh plz in

Theih e. A theih tehmeuh mai. Mipa chi kha hmeichhe chhul (chi bawm)-ah a luh a, ni 6 chhunga hmeichhe chi nung (egg) nen a intawn fuh chuan than thi neih hma pawhin a rai theih. Hmeichhe than thi neih hma hapta 2 velah hian chi nung (egg) a insiam a. Chi nung an neih hnuin than thi an nei tlangpui chauh thin. Than thi neih hma ni 6 chhunga mipa chi nungin chhul a chhuahsan lohva a thi tlaw mai a nih bawk si loh chuan a rai theih tihna a nih chu. Mihringte hi kan inang vek lo ka tih kha. Thenkhat chu thi an neih hnu kum tam takah pawh an rai mai lova. Thenkhat erawh thi neih hma daih a rai pawh an awm. Dan naranin hmeichhia kum 12 chin chu thi nei thei emaw thi neih hun tawh emaw a ngaih a ni a. Mahse, hmeichhe thenkhat chu kum 12 hmalam a thi nei pawh an awm nual. Thil theih a nihzia tilang chiang em em tu chu kum 5 mi lek Peruvian hmeichhe naupang rai kha a ni a. Ani kha hmeichhe naupai naupang ber record siamtu a ni. Chhan hrang hrang avangin chi nung a insiam hnu pawhin miin than thi a la nei lo reng thei ve a. Chuvangin, than thi neih hi rai theih hun tehna a ni ber lova, a tlangpui thu-ah erawh chuan rai thei lova ngaih an ni.

Thi neih zawh hlim a ni si a

Admin — Sat, 24 Jul 2010 03:33:44 +0000

Tleirwl kum 17 mi ka ni a thla hmasa mai khan ka bialpa tlangval tawh nen kan chesual hlauh mai a ka period zawh atanga ni khatna ciah ania hetiang ang hunah hian a rai theih em th hi hriat ka duh a ka rilru hah lutuk hi chaw pawh ka ei tha thei lo a rai ka la duh bawk si lo khwgaih takin a rang lamin k zawhna hi mn l chhan sak thei ang em?(n0 thup plizz..)

In ti dun tawh a, in zo fel diam tawh a, tlai khawhnu a rilru hah phah nana hman leh si chu a fin thlak loh khawp mai. Engahnge pregnancy test i tih mai loh? Cheng tam pawh seng lovin mahniin zing thawh hlimah a in-test mai theih alawm. Theih tehreng mai. Hmeichhe chi nung lo chhuah hun hi dan naran a chhutna maiah lo chuan a pangngai diak diak vek kher lova. Mipa chi nung leh hmeichhe chi nung a intawn fuh chuan, rai a ni mai. A chhuah hun a inan tlat loh avangin chuti maiin i mimal case bik hi chhan theih a ni lo. Thi neih hlim atang emaw thi neih leh hma ni 14 velah hian hmeichhe chi nung hi chhulah lo chhuakin mipa chi a zawng a. A hmuh loh chuan a thi ve mai thin. I thi neih leh ni tur i chiang lo ang bawkin i chhul a chi nung luh hun tur pawh i hre lawk thei lo tluk a ni. Chuti a nih chuan thi neih hma ni khat lek awmah pawh a rai theih tihna a nih chu. Mahse, test phawt a finthlak ber. I lo rai lo maithei asin.

Thi neih tlem phah, ka rai em?

Admin — Sat, 24 Jul 2010 03:32:54 +0000

Tleirol kum16 k nia gaijwg kneia kan n hmagai em vg n k thiaghlimna cu k hlana..egmh damdwi k eibwk s lova thla hmasa kha cuan thi tlemte k neia mhs atlem lutk a tunthla ah k la nei bwk s lo karai tehi animai lomw k buai tak jet ani k n ceck gam bwk s lo..amah silh tur n kan khua in ag bwk s lo khwgai n mn tanpui hram rwh!pliz n no thup w…..

Mihring taksa leh hriselna a inang lova, rai theih dan pawh a inang vek thei hek lo. Vawi khat inpawl ngawt pawhin a rai theih a, kum 20 chuang innei tawh pawh fa nei lo a awm theih tho thung. Rai dawn a thi tlem neih hi hmeichhe tam tak chunga thil thleng pangngai a ni ve fo. “Tun thlaah ka nei bawk si lo,” i tih hian min tibuai tlat. I la nei lo nge i nei tawh lo zawk? Rai tih hriat harsa tawk chauhva thi neih a, a hnu thla atanga thi hul daih hi an awm fo. Damdawi ei lova CD in hman bawk si loh chuan, a rang lama inenfiah thuai a tha ang. A eng a mah hmaa i tlangvalpa lo hrilh cheng cheng a ngai hran lo. A tul a nih erawh chuan khaw hmun lo tih vel mai mai chhuanlam a tling tur a ni hek lovang. I tihtur hmasa ber chu pharmacy a pregnancy test-na lei a ni mai. Mahnia in-test theih nan zun test-na an tih mai (Mizote hian a hming ang hialin kan hmang bel tawh hlawm a nia) lei la. I zing zun far lut la. A rawng a danglam chuan i rai a ni mai. Minute tam nghah a ngai lo. A ruk a tih a harsa lo.

Kum 6-a upa leh mahni rualpui bialnu thlan zawk tur hre lo

Admin — Sat, 24 Jul 2010 03:31:36 +0000

Tunah hian kum 18 ka ni ve toh a bialnu kei aia kum 6 vela upa ka nei a mhse amah cuan min duh m2 a kei cuan ka kham khop silo ka rualpui lek in min ngaixog ve Tho bok si ticuan ka kop ta a,ka rualpui nu cu ka biak loh cuan keimah hy ka buai vek thin,a upa xok thug eroh ka nig hluah2 thug ka then chuan a rilru a na dwn bok si,ka then loh cuan ka inthiam thei bok silo,tichug cuan kan awm dun fo bok si,mhse kan la chesual m l thug,inruk pui ah te min swm a,i nupui ka ni dawn te a ti bok a,cuan min ring m2 bok si egtin ge ka tih tak ang a naupang xok cu ka duh xok bok si. Numbr thup pliz

Duh zawk i nei tih i hre chiang tawh a, a upa zawk chu then ngei duh khawp a thutlukna i siam fel theih phawt chuan eng aiah nge i then mai loh ang? Inpawlna chungchang pawh ni si lova ka kham khawp si lo i tih awmzia hi ka hre thiam lo. I duh tawk tak tak lova, iai rukna i nei niin ka ngai.

I ning hluah hluah a, in inkawm leh tho thin bawk si. In inkawmnaah lah sex in hmang dun lo chauh a ni mai a, chutiang taka inpawh tawn si chuan i ning em em lawi si a. A chhan ni thei awm chu i kum rualpui bialnu dang i neih vang a ni thei. A upa zawk nena in inkawp tirh khan i lungsi hle a ni lo em ni? I kum rualpui bialnu i neih hma nun kha dawn let leh la, khatihlai khan i lungawi em? I lungawi a nih ngat chuan bialnu i neih vang mai a ni a, a upa zawk kha i hmangaih hle tihna a ni ang.

A tir atanga ning hluah hluah chunga kawm reng i nih ka ring lo hrim hrim. I lungawi thinna kha bialnu i neih achinah a kiam tial tial a. Tunah phei chuan i haw tep tawh hial maithei asin. Eng pawh nise, kum 24 mi nula (emaw nuthlawi pawh nise) chuan tlangval tuaitir nangni ang duang chu an awk tang thiam khawp ang che u.

I kum rualpui i bialnu thar zawk chu i biak loh hlek pawha i buai vek zel chuan, buaina dang insiam tur khawpa i malmak duh ka ring lo. Huaisen takin thutlukna siam la. Chu i thutlukna chu a upa zawk leh a naupang zawk hrilhin sawi pui ve ve la. Na zawk an lo awm a nih pawhin thenna hi inhmangaih leh inngaizawngte inkarah chauh ni lovin thiantha karah pawh a na tho tho tih pawh rawh. Nangmah inngaihtuah hmasa ber la, i nupui tura i duh i bialnu chu i thlang fel thei mai ang.