Chantawk khuarel a rawng lua e

By P.C. Laldinliani

Chhawrthlapui eng mawi tak, chhum dum chhah pui puiin a hliah thim ruai ruai ang mai hi a ni ka hringnun chu! Hlimna leh lawmlai niten mual min liamsan a, lungngaihna leh mang-anna chhumpui chuan min bawm ta zawk si! Chu Phengphehlep tial mawi tak chuan kumkhua, chatuan atan min thlawhbosan dawn ta a ni. Hlimna tam tak min siamsak a. Vawi tam tak ka tahna thlen thintu khan pangpar mawi zawk bawm tumin min kalsan hlen dawn ta a nih chu! Amaha ka beiseina sang tak leh ka lo innghah vena lungphum zawng zawngte chu chim vekin, Chhimbal mawi taka zamral ta ang maiin a lo ral ve dawn ta a ni!

Aw…Phengphehlep chi-mawm! Aw..Phengphehlep duhawm..huat-thlala, theihnghilh theih tur si loh maw i lo nih le? Pangpar pakhata lungawi lova, par zu tam tak tlan kual a, thlawhbosan leh ching mi i ni thin reng lo em ni? Parmawina zawng zawng a tlan zawh hnu, thlumna reng reng nei tawh lote zinga pakhat chu ka lo ni ve ta si! Thuphachawina leh ngaihdam dilna mai hian ka thinlung hliam chu a thawidam zo ta lo! Engtik hunah emaw chuan, amah vanga ka lungngaihna leh thinlung natna zawng zawng chuan mual min liamsan ang a, ka ngai leh tawh ngai lovang!!

Chu zan boruak thiang tak hnuaiah chuan a hmel chu naupang pawisawilo ang maia thianglim leh duhawm a ni. Ri mang lova a nui ri te chuan chhungrilah min la tham a. Vawi tam tak ka thinlung a hliam tawh chung pawha ka la hmangaih cheu chu tudang ni lovin AMAH ngei hi a ni si!!

“Nizanah ka mumangah ka lo hmu che a,” zawi thawp satin a rawn tichhuak a.

“Engtinnge min lo hmuh a?”

“Ka mumangah lehzel pawh i hnenah ngaihdam ka lo dil che a. Chuvangin, i mi ngaihdam ka ngai a ni.” A awka chu a dam raihin a runthlak kher mai! Pathian leh!! Ka ngaih-dam ngaiin a inhre ve a nih chu!! Ka thinlung a tuiral vek thei hial awm e. Mahse, vawi sang tam tak pawh ngaihdam min dil mahse, a man zo dawn em ni? Ka tuarna hrehawm leh rapthlak tak kha, khawvel eng tawngkam thiamna mah hian a man zo mawlh lo!!

“Ngaihdamna tur engmah a awm hleinem! Mipain ngaihdam ngaiin thil an ti ngai lo. I duhthlanna ngei i hmang a lawm,” tiin ka chhang a. mahse, ka thinlung erawh a tap a ni. Engvanga ngaidam theilo nge maw ka nih reng le? A lakah ka phut sang lutuk em ni zawk? Ni lo..nilo..Thildang a tihsual chu a siamthat leh theih pawh a ni mahna. Mahse, he a thiltih sual erawh hi chu engtikahmah kan siamtha ngai tawh lovang. Chelhdin ruallohvin hun chuan a liampui a. Hriatrengna chu engtinmah a nawhreh theih tawh si loh!!

Hun a ral a, ni a liam a. April 15 zan a lo inherchhuak ta. He zan hi ka tana theihnghilh theih loh tur, zan chhinchhiahtlak, duhawmlo tak a ni. Ka hmangaih ber nen chatuan atana inthen hlen tawh tura ‘Thu’ kan thlun zan a lo ni ta! Chu Chhawr-thlapui eng ruih mai chu kan inkar thuthlung min hriatpuitu a ni a. A tukzing nichuak eng mawi tak chuan sut leh theih tawh loh turin a rawn nemnghet ta si!!

Ka hlimna leh ka thinlung zawng zawng nei thintu, englai maha ka theihnghilh loh tur chu thla eng ruih hnuaiah chuan muang takin a let chhat chhat a. A ke pen ri chu mitthi dar ri ang maia ngaihnawm loh a ni. A inhmeh fo thin a thawmhnaw hak nen chuan mitthla-ah a cham reng dawn a ni. Ka thinlung natna leh tuarna chu a intan dawn chauh tih ka hria a. Engtinnge maw ka tuarchhuah tak ang le? “Nanglo chu tumah duh tak tak ka nei lo. I tello chuan nuam ka ti tak tak lo..” titu ngei chu. Ka chhia leh tha hriatna Court-in a nundan chu diklo tia thiam loha chantirin, thil tha ber nia ka hriat angin, kumkhua atan ka lo mangtha ta a ni.

Tunah zet zawng ka duhthlanna ngeiin mi chanve ang lek ka lo ni ta! Taksa him pial si in, thinlung chhungril erawh chuan tihdam theih loh natna a pai a. A hmangaihna thlazar hnuaiah thlamuang taka ka awmlai nite kha…dawn titam…tah-khua tiseitu mai a lo chang zo ta!! A tel lova hringnun hman khawharthlak zia hi tuin nge sawifiah thei ang le?

A tawng dan te, a nuih dan te, kan inhriattirh lai vela kan awmdan zawng zawngte, an Ina min kalpui hmasak ber tum te, ka hminga min koh hmasak ber ni te, a mitmeng tawrhhar runthlak taka min en lai te, a hriat hauh lohva atana mittui tla zawih zawiha ka tawngtai thin laite leh atthlak taka ka thinur changa min dawhtheih lai hun zawng zawngte kha. A engkim mai chu ka mitthla-in a la hmu thei vek mai! Namen lovin ka thinlung chu a leng ta vawng vawng a, engtinnge ka tih tak ang? He khawharna leh lungngaihna ata hi tunge min chhhanchhuak ta ang le? Ka hringnun parvul vanglai tak chu, a zunah ngetin a lo chuai zo ta si! Enkawla, chawm nung theitu awm tak ang maw?

Suangtuahna mitthla mai zawng a tawk si lo!! Kan hlimthla-a suihlung ka ruallai ni zawng zawngte chu ka han en a. A ngaitein kan la lang a, ngaihnobei takin a lo meng si sap a. Ka en a, ka en reng a. Ka thinlung khawharna chu a hnem zo tak tak si lo. Ka nun ram chu thlaler ang maia ruak a ni.

Hun leh ni inher vel chuan hlimna ni a rawn herchhuah pui ta! Thlifim thaw heuh heuh chuan hruizam leh thinghnah nem te chu a chhem kur siau siau a. Luikam tiauvut leh lung khawkrawk, lui tui luangri dem dem a Sangha te takte te lengkawi zek zek te chuan min tidam sawng sawng mai. Ka thinlung na zawng zawng min upbeh sak a. Hlim takin min lentir a, ka thinlunga lawmna pangpar chuai mek pawh a rawn tivul leh ta. Mahse, tlaikhua a lo ngui a, zan a lo thleng a. Ka hlimna chuan rei a daih leh si lo!! Aw..engatinge Khuannu pawh hian hetiang em a vanduai tura min lo duan? A tello chuan damzo dawnin ka inhre mawlh lo. Ka thinlung chhungril chu khawharna in a zem tlat a. Englaimahin ka theihnghilh thei silo.

Thenrualte chu hlim takin Di nen an leng a. Sawtna awm hauh lovin ka thin a lo ur a. Chhawrthlapui eng mawi tak pawhin ka tan awmzia reng a nei pha ta lo. Tunhma kha chuan khawvel hian ka tan mawina tinreng a chhuah a. Mi zawng zawng an hlim a. Mahse, tunah zawng beisei tur leh damchhan reng a awm tawh lo. Hlimna chuan hnutiang min chhawn a. Khawvel parmawi chu ka tan lak bova awmin, a hling chauh chu ka chantawk a lo ni ta! Ka tawrh ang tuar, hringfa leng zingah awm tak ang maw? Engkim mai chuan AMAH min hriatchhuah tir a. A… heti ringawt zawng a ni thei love. Ka nunkhua chu amah leh midang nena khaikhin reng rengin ka hmang kumkhua dawn em ni? Kan inhmangaihnna mawi tak kha, zing tiauchhum leh daifim ang maiin a lo ral zo ta a.Enga tinge sam ang then zai kan lo rel tak mai chu le?

Hmangaih lungdi tawng thin mah ila, kei atan zawng tahna leh lungngaihna mai a chang leh thin. Nun hian awmzia a nei tawh lova. Ka suangtuah phak ngai loh, khawvela mi hlauhawm ber, mi beidawngte dinhmunah ka lo ding ve ta reng mai!! Tunah zet zawng, CHANTAWK KHAUREL A RAWNG LUA A NI, ti chung zelin ka damchhung hun ka hmang dawn ta a ni.

(Published on January 2010)